Qazirgi qazaq teatryna – jańa sóz, sony kózqaras kerek. Osy maqsatta Astanadaǵy Jastar teatry zamanaýı avtorlar, dramatýrgııalyq oıy bar jas qalamgerlermen bas qosyp, «Ádebıet pen teatr toǵysy» taqyrybynda dóńgelek ústel ótkizdi.
Dóńgelek ústelde qazirgi dramatýrgııanyń baǵyty, teatr men ádebıettiń ún qatysýy talqylandy. Sharaǵa jınalǵan qalamgerler men dramatýrgter teatr men ádebıet arasyndaǵy shyǵarmashylyq baılanysty kúsheıtý, sahnaǵa beıimdelgen dramalyq shyǵarmalarǵa jol ashý týraly oılaryn ortaǵa saldy.
Jańa qoıylymdar men klassıkalyq shyǵarmalardyń arajigi, qalam ıeleriniń rejısserlermen baılanysqa túsýi, sahnaǵa shyǵarýǵa turatyn eleýli shyǵarmalardyń moldyǵy haqynda alýan pikirler órbidi. Sonymen birge búgingi jas dramatýrgterdiń azdyǵy, bolashaqta ádebıet pen teatr birlesip, qarymdy jobalardy qolǵa alýǵa tıis ekeni tilge tıek etildi.
Sondaı-aq Jastar teatry jańa shyǵarmalarǵa «Jańa tolqyn – jańa drama» atty ashyq baıqaý jarııalap otyr. Baıqaý sharty boıynsha qatysýshy úmitkerler shaǵyn pesa, sahnaǵa laıyq poetıkalyq sıkl, monodrama, qysqa proza, sahnalyq novella usyna alady. Teatrdyń kórkemdik keńesiniń súzgisinen iriktelip shyqqan shyǵarmalar sahnaǵa jol tartady. Al shyǵarmasy úzdik shyqqan avtorlar (repıtısııalyq úderis, sahnalyq zerthana) shyǵarmashylyq sheberhanaǵa qatysa alady.