Jazýshy qaýymǵa sýretshilik óner asa bóten bolmasa kerek. Ekeýine de kórkemdik ortaq. Biri kesteli sózben, biri san boıaýmen órnekteıdi. Árıne, eń basty negiz – kórkem oı men sheberlik. Sýretshiler sózge sarań bolǵanymen, jazýshylarda sýretshilik kózqaras – ásemdikti kórý, baıqaý ǵadetteri bar.
Aqyn-jazýshylardyń sýretshilik talanty týraly sóz qozǵaǵanda oıǵa aldymen Pýshkın men Lermontov túsedi. Qazaq aqyny «Poet krasıvyı doljen byt, kak bog. Kto vıdel boga? Tot, kto vıdel Pýshkına» (Oljas Súleımenov) dep jyrǵa qosqan Pýshkın qylqalamynan júzdegen portret, peızajdyq eskızder, qustar men jylqylardyń sýretteri, shyǵarmalaryna arnalǵan ıllıýstrasııalar týdy. Keıde ol bir kartınada ómirde bar keıipkerler men qııaldan týǵan personajdardy qosa beıneleıdi. Máselen, ózi men Evgenıı Onegındi. Búginde bul eńbekter aqynnyń memorıaldyq mýzeılerinde saqtalyp tur.
Lermontov ta sýret salýǵa bala kezinen qyzyqqan. Keıin Kavkazǵa jer aýdarylǵanda sýretshilik qabileti erekshe ashyla bastaıdy. Munda Lermontov ásker ómirinen karıkatýralar salady, portretter men peızajdar jazady. Kavkazǵa alǵashqy saparynyń ózinde-aq aqyn tamsanǵan kórikti jerlerin qaǵazǵa túsirip úlgergen. 1837 jyly S.Raevskııge jazǵan hatynda osy sapardan Peterbýrgke sátti bir toptama ala kelgenin jazady. Senesiz be, Lermontovty tipti kásibı sýretshiler de kóshirgen. Atap aıtsaq, aqynnyń sýretteri boıynsha birneshe akvareldi sýretshi knıaz G.Gagarın jasady. Biraq búgingi kúnge Lermontov kartınalarynyń az ǵana bóligi jetti. 13 maıly boıaý, 44 akvarel men 400-ge jýyq sýret. Bul eńbekter Pýshkın úıinde, Memlekettik ádebı murajaıda jáne Máskeý, Tarhan, Pıatıgorsk qalalaryndaǵy Lermontov memorıaldyq murajaılarynda saqtalǵan.
Al Shevchenko sýret salýdan sabaq berdi. Saıası qýǵynda júrgende geologııalyq ekspedısııalar quramynda sýretshi boldy. Aral men Kaspıı teńizderin aralady. Odan bólek, Taras Grıgorevıch stanoktyq keskindeme, grafıka, monýmentaldy jáne sándik keskindeme, músin salalarynda jumys istedi. Jazýshy tipti gravıýra akademıgi atandy.
Antýan de Sent-Ekzıýperıdiń kásibı ushqysh, jýrnalıst, ónertapqysh, karta sıqyrshysy jáne sýretshi ekeni málim. Jazýshynyń álemge áıdik ertegisi – «Kishkentaı hanzada» da avtordyń ádemi ıllıýstrasııalarymen tanymal. Ekzıýperı qoljazbany syzbalarymen birge baspaǵa tapsyrǵanda, mátin men sýretterdiń tutas bir shyǵarmadaı ekeni anyq kóringen.
Maıakovskıı de poezııada qandaı talantty bolsa, beıneleý ónerinde de osal emes edi. Bala kezinen sýretke ıkemi bolǵan aqynnyń otbasynda bári derlik – ákesi de, anasy da, ápkeleri de sýret salǵan. Al stýdenttik jyldarda ol tanymal plakattar men ashyq hattardyń serııasyn jasaýǵa qatysady. Maıakovskııdiń Kazımır Malevıchpen birlesip jasaǵan jumystary zor tabysqa jetti. Osydan soń aqyn qoǵamdyq-saıası oılarǵa qurylǵan satıralyq plakat jasaýmen aınalysty.
Al Gıýgo sýretshiliginen myńnan asa kartına qalypty. Onyń kóbi, negizinen óz shyǵarmalaryna ıllıýstrasııalar. Gıýgo tek boıaýmen, qaryndashpen ǵana emes, qara kofemen de sýret salǵan.
Qazaq qalamgerleri arasynda kórkem sózimen birge sýretti de jaqsy salatyndardy bilemiz. Máselen, jazýshy, kompozıtor Ilııa Jaqanovtyń sýretshiligi ámbege aıan. Qazirgi tańda da qylqalamyn qolynan tastaǵan joq dep estımiz. Bálkı, adamnyń sýretshilik darynyna týǵan jeriniń tabıǵaty da áser etetin bolar. «Altaıdyń kerbuǵysy» atanǵan Oralhan Bókeı de bos ýaqytynda sýret salatyn desedi. Sondaı-aq Oralhan Bókeıdiń dosy, aýdarmashy Anatolıı Kımniń sýretshilik óneri bar. Jeke albomy da shyqqan. Dál osy Altaıdyń baýyrynda ómirge kelgen jazýshy Álibek Asqar jazýshylyqtan buryn sýretshi bolýdy armandapty. Kórkemsýret ýchılıshesin kitap bezendirý mamandyǵy boıynsha sýretshi-grafık bolyp bitirgen ol óz kitaptaryn ózi bezendiredi. Jalpy, shyǵarmashylyq adamynyń boıynda kezdesetin qaı óner de bir-birine áser etpeı qoımasy anyq.