Mańǵystaýdyń týrıstik oryndary týraly materıal kórikti sýretterimen Ispanııanyń «VIAJAR» atty tanymal jýrnalynda jaryq kórdi.
Mańǵystaý óńirlik týrızm basqarmasynyń qoldaýymen jýrnal redaksııasy daıyndaǵan basylymnyń arnaıy sanynda eýropalyq aýdıtorııa Bozjyra shatqaly, Sherqala taýy, Tuzbaıyr, alyp sharlar ańǵary, Kaspıı teńizi jaǵalaýy, sondaı-aq óńirdiń kıeli oryndary jáne mádenı murasymen tanysty.
Materıal ádemi fotosýrettermen, ólkeniń tabıǵı jáne tarıhı erekshelikterin aıqyndaıtyn avtorlyq sıpattamalarmen tolyqtyrylǵan. Mańǵystaý oblystyq týrızm basqarmasy «VIAJAR» jýrnalynda Mańǵystaý oblysynyń tanystyrylýy – elimizdiń týrıstik áleýetin halyqaralyq deńgeıde tanytý baǵytyndaǵy júıeli jumystyń nátıjesi dep túsindiredi. Aıtýlarynsha, bul sheteldik týrısterdi tartýǵa, óńirdiń ımıdjin qalyptastyrýǵa jáne Eýropa naryǵymen týrıstik baılanystardy nyǵaıtýǵa jańa múmkindikter ashady.
Al 1978 jyly negizi qalanǵan «VIAJAR» – Ispanııadaǵy eń alǵashqy jáne kóne saıahat jýrnaly sanalady. Aýdıtorııasy Ispanııamen qatar Latyn Amerıkasy elderi men Eýropa týrıstik qaýymdastyǵyn qosa qamtıtyn basylym 45 jyldan asa ýaqyt boıy oqyrmandaryna sapaly reportajdar, avtorlyq baǵyttar men qyzyqty materıaldar usynyp keledi. Endi «VIAJAR» arqyly Mańǵystaýdy tanyǵan týrıster kıeli ólkege at basyn buratyny sózsiz.
Mańǵystaý oblysy