“QARAShYǴANAQ-ORAL” JOBASY

Batys Qazaqstan oblysynyń kóptegen eldi mekenderine “kógildir otyn” jetkizdi Búgingi kúni bul jobanyń bas­taýshysy da, tikeleı qoldaýshysy da ózge emes, tikeleı Memleket basshysy Nursultan Nazarbaev bolǵanyn aıtýdyń ózi bir mártebe. “Qarashyǵanaq-Oral” gaz qubyry qurylysy – tap-taza áleýmettik joba. Mundaı baǵyttaǵy jobalar­dyń ekonomıkalyq-qarjylaı qaı­tarymy, belgili bir ýaqyt ótkennen keıin túsiretin paıdasy bolmaıdy. Esesine onyń ıgiligin barsha qazaqstandyqtar, el men jurt, turǵyndar kóredi. Bul eldiń áleý­mettik-turmystyq deńgeıin jeńil­detý, ál-aýqatyn kóterý jolynda jasalatyn qamqorlyq bolyp tabylady. Atalǵan jobany Elbasy budan bes jyl buryn Aqjaıyq óńirine sapary kezinde usynǵan edi. Jobany júzege asyrý merzimi eki kezeńge belgilengen bolatyn. Onyń alǵashqy kezeńinde Qarashy­ǵa­naqtan Bórli aýdanynyń birqatar eldi mekenderi men Terekti aýdany­nyń ortalyǵyna kógildir otyn jet­kizý belgilendi. Bul mindet ótken jyldyń aıaǵynda iske asty. Osynaý ıgi sharanyń ashylý rásimine respýblıka Premer-Mınıstri Kárim Másimov qatysqan-dy. Al búginde onyń ekinshi kezeńi de márege taıap “Qarashyǵanaq-Oral” gaz qubyry jobasy sheń­berinde keshegi kúni Jaıyq ózeni­niń sol jaq bóliginde ornalasqan Syrym jáne Qaratóbe aýdandary ortalyqtaryna gaz qubyry tarty­lyp, alaý jaǵý rásimi ótkizildi. Bul – uzyndyǵy 552 shaqyrym keshendi gaz qubyry men gaz aıdaý jú­ıesi degen sóz. Osy arqyly 146 eldi mekendegi júz myńnan astam tur­ǵynnyń kógildir otyn ıgiligi men qyzyǵyn kórýine jol ashylyp otyr. Eń bastysy, “Qarashyǵanaq-Oral” gaz qubyry qurylysyn iske qosý arqyly Aqjaıyq óńirindegi barlyq aýdan ortalyqtaryna gaz qubyry tartyldy. Osy jobanyń sońǵy, úshinshi satysynda ár aýdan­daǵy aýyldarǵa kógildir otyn jet­kizý jumystary aldaǵy jyldary odan ári jalǵaspaq. Osynaý derek pen jaǵymdy jáıttiń ózi Oral óńi­rin tolyq gazdandyrý baǵdarla­masy márege taıap keledi deýge tolyq negiz ben alǵyshart qalaı alady. Osy arada sál sheginis jasaý­dyń da reti kelip turǵandaı. Aı­taıyn degenimiz, óńirdi tolyq gaz­dan­dyrý baǵdarlamasy táýelsizdik­tiń alǵashqy jyldarynda bastalǵan edi. Osynaý qıyn kezeńniń ózinde shalǵaıdaǵy Kaztalov, Jánibek jáne Aqjaıyq, Tasqala, Zelenov aýdandaryna gaz qubyry tartylyp, turǵyndar ot jaǵyp, kúl shyǵarý mashaqatynan qutyldy. Bul iske sol kezdegi oblys basshysy, búgingi Parlament depýtaty Qabıbolla Jaqypov úlken úles qosty. Atalǵan baǵdarlamany aıaǵyna deıin jetkizý jumystary sońǵy úsh jylda qyzý qarqyn aldy. Ásirese, joǵaryda aıtylǵan Qarashyǵanaq-Oral jobasyn iske asyrýǵa qatys­ty Elbasy tapsyrmasyn oryndaýda Batys Qazaqstan oblysynyń bú­gin­gi ákimi Baqtyqoja Izmuhambetovtiń iskerlik pen tyndyrymdylyq úlgi­sin kórsete bilgenine el kýá. Bul jóninde shalǵaıdaǵy Qaratóbe aýdanynda ótkizilgen alaý jaǵý rásimi kezinde osy tekti topyraqtyń baıyrǵy turǵyny, eńbek ardageri Nájim Dáýletov aqsaqal bylaı degen edi: – Aýylymyzda kógildir otyn alaýy tutanǵan búgingideı qýa­nyshty sátte meniń oıyma qazirgi qazaq ádebıetiniń aqsaqaly Ázilhan Nurshaıyqovtyń “Egemende” ja­rııa­­lanǵan maqalasynda kel­ti­rilgen “...Elbasyn maqtaýdyń keregi joq, onyń isin jaqtaı bilý kerek” degen ornyqty da qısyndy sózi oralyp otyr. Mine, Elbasynyń isin jaqtaı biletin osyndaı oblys ákimderiniń biri Baqtyqoja Izmuhambetov dep bilemin. Ol sózi men isiniń arasyn­da alshaqtyq joq basshy. Onyń Elbasy tapsyrmalaryna ár kez sergek qarap, óńirde energetıkalyq táýelsizdik, azyq-túlik qaýipsizdigi sekildi utymdy ınvestısııalyq jáne áleýmettik jobalardy iske asyrýǵa bel sheshe kirisip ketetini súısindiredi. “Qarashyǵanaq-Oral” gaz quby­ry jobasy ekinshi kezeńiniń aıaq­ta­lý rásimine Munaı jáne gaz mı­nıs­tri Saýat Myńbaev qatysyp, El­ba­sy atynan barsha batysqazaqstan­dyqtardy osynaý iri áleýmettik jo­banyń iske asýymen quttyqtady. Temir QUSAIYN. Batys Qazaqstan oblysy.