Sý resýrstary jáne ırrıgasııa mınıstrligi barlyq óńirde «Qazsýshar» RMK fılıaldaryn arnaıy jańa tehnıkalarmen qamtamasyz etý jumysyn jalǵastyryp keledi. Búginge deıin kásiporyn fılıaldary 524 avtokólik pen qural-jabdyqqa qol jetkizdi.
Jańa tehnıkalar sýarý kanaldaryn mehanıkalyq tazalaý men gıdrotehnıkalyq qurylystardy jóndeýge paıdalana bastady. Jalpy alǵanda, «Qazsýshar» fılıaldaryna barlyǵy 757 avtokólik pen qural-jabdyq berý josparlanyp otyr.
Mınıstrlik usynǵan tehnıkalar qatarynda ekskavator, tıegish, shynjyr tabandy ekskavator, traktor, tirkeme, samosval, tartqysh kólik, avtokran, janarmaı tasymaldaǵysh, qosalqy qural-jabdyq pen dızeldi generatorlar bar.
«Jańa tehnıkalar vegetasııa kezeńiniń turaqty ótýine jaǵdaı jasaý úshin, sonyń qatarynda kanaldardyń ótkizý múmkindigin arttyrý maqsatynda olardy tazalaý jumysyna qoldanylady. Qazir «Qazsýshar» fılıaldary jalpy uzyndyǵy 2 011 shaqyrym bolatyn sýarý kanaldarynda mehanıkalyq tazalaý jumysyn júrgizýde, onyń 780 shaqyrymynda jumys aıaqtaldy», dedi Sý resýrstary jáne ırrıgasııa vıse-mınıstri Erbolat Ibraıhanov.