Memleket basshysynyń tapsyrmasyn júzege asyrý aıasynda elimizde zańsyz shetelge shyǵarylǵan aktıvterdi elge qaıtarý arqyly áleýmettik nysandar salý jumysy jalǵasyp jatyr. Arnaýly memlekettik qordan Qyzylorda oblysyndaǵy densaýlyq saqtaý salasyndaǵy birqatar jobaǵa shamamen 7 mlrd teńge bólindi.
Bul qarajat Aral, Qazaly, Shıeli, Jańaqorǵan aýdandaryndaǵy ortalyq aýdandyq aýrýhanalar janynan jańa ǵımarattar salýǵa baǵyttalǵan. Onda ınsýlt ortalyqtary, rentgenhırýrgııa bólimsheleri jáne basqa da beıindi bólimder ashylyp, zamanaýı medısınalyq jabdyqtar: magnıttik-rezonanstyq tomografııa, kompıýterlik tomografııa, angıografııalyq qondyrǵylar ornatylady. Jobalar júzege asqan soń, aýyldyq jerlerdegi 300 myńnan astam turǵyn mamandandyrylǵan medısınalyq kómekke qol jetkizedi. Nysandardy bıyl paıdalanýǵa berý josparlanǵan.
Al Jambyl oblysyndaǵy aýrýhanalardy rekonstrýksııalaýǵa Arnaýly memlekettik qordan 2,4 mlrd teńge bólindi. Atap aıtqanda, bul qarjyǵa «Aýyldyq densaýlyq saqtaýdy jańǵyrtý» ulttyq jobasy aıasynda Jambyl oblysynyń Merki men Talas aýdandaryndaǵy aýdanaralyq kópbeıindi ortalyq aýrýhanalardy rekonstrýksııalaý kózdelgen. Máselen, qaıtarylǵan aktıvterdiń bir bóligi Talas aýdandyq kópsalaly ortalyq aýrýhanany rekonstrýksııalaýǵa baǵyttalmaq. Qarastyrylǵan qarajat kólemi – 2,3 mlrd teńge.
Al Merki aýdandyq kópsalaly ortalyq aýrýhananyń qabyldaý bólimshesin jóndeýge 144,9 mln teńge jumsalmaq. Qurylys jumystary sońǵy satyda. Nysandy paıdalanýǵa berý jyl sońyna josparlanǵan. Jalpy alǵanda, bıyl Arnaýly memlekettik qordan Jambyl oblysynda tórt densaýlyq saqtaý nysanyn iske qosýǵa 2,8 mlrd teńge baǵyttalǵan. Buǵan deıin Qordaı, Talas aýdandarynda eki dárigerlik ambýlatorııanyń qurylysy salynǵany týraly habarlanǵan bolatyn. Olardyń árqaısysy táýligine 45 kelýshige deıin qabyldaı alady.