Memleket basshysynyń jyl saıyn 150 myń gektar jerge sý únemdeý tehnologııalaryn engizý jónindegi tapsyrmasyn oryndaý sheńberinde Sý resýrstary jáne ırrıgasııa mınıstrligi sharýalardy zamanaýı sýarý júıelerine kóshýge yntalandyrý tetikterin ázirledi. Sala mınıstrligi fermerlerge sý únemdeý tehnologııalaryn satyp alý-ornatý boıynsha jáne ınfraqurylym tartý kezinde uńǵyma burǵylaýǵa jumsalǵan shyǵyndardyń ótemaqy mólsherin 50%-dan 80%-ǵa deıin ulǵaıtty, dep jazady Egemen.kz.
Sonymen qatar tarıf qunyna qaraı sýarý sýyna saralanǵan sýbsıdııalar engizildi. Sý únemdeý tehnologııalaryn qoldanǵan jaǵdaıda sýbsıdııa kólemi 60%-dan 85%-ǵa deıin ósedi, al qoldanbaǵan jaǵdaıda – tarıfke baılanysty 50–75%-dan 30–55%-ǵa deıin tómendeıdi.
Sala mınıstrliginiń málimetinshe sondaı-aq lazerlik tegisteýshi satyp alýǵa beriletin sýbsıdııa egis alqaby keminde 200 gektar bolatyn sharýashylyqtarǵa ǵana tólenedi degen talap alynyp tastaldy. Lazerlik tegisteý sýarmaly sýdyń alqap aýmaǵyna birkelki taralýyna múmkindik berip, sýdy 30%-ǵa deıin únemdeýge jaǵdaı jasaıdy. Bul ásirese qýańshylyqqa beıim óńirler úshin ózekti. Mundaı tehnologııa elimizdegi kúrish alqaptarynda belsendi qoldanylady.
Nátıjesinde 2024 jyly sý únemdeý tehnologııalary 158 myń gektar jerge engizildi, onyń shamamen 130 myń gektary – ońtústik óńirlerde tur. Jalpy sý únemdeý tehnologııalary qoldanylǵan jer kólemi 470,2 myń gektarǵa jetken. Osy jyl basynan beri elimizde sý únemdeý tehnologııalaryn qoldanýdyń jalpy aýmaǵy 580 myń gektardan asty.
«Memleket basshysy sý únemdeý tehnologııalaryna kóshýdiń mańyzdylyǵyn birneshe ret atap ótti. Klımattyń ózgerýi jaǵdaıynda bul – eldiń sý qaýipsizdigin qamtamasyz etý úshin qajet shara. Oblys ákimdikterimen birlesip, 2030 jylǵa deıin egis alqaptarynda sý únemdeý júıelerin engizý josparyn ázirlep, bekittik, nátıjesinde 2030 jyldyń sońyna deıin jylyna 2,2 mlrd tekshe metr sý únemdeýdi kózdep otyrmyz», dedi sala mınıstri Nurjan Nurjigitov.