Qor kompanııalar tobynyń biryńǵaı qaıyrymdylyq operatory – «Samruk-Kazyna Trust» qorynyń Pavlodar men Shyǵys Qazaqstan oblystaryndaǵy balalar úıleriniń 100 tárbıelenýshisin kásibı baǵdarlaýǵa arnalǵan «Samruk Umiti» jobasy óz nátıjesin berip otyr.
«Jetim kórseń – jebeı júr» deıdi dana halqymyz. Bul – ata-babamyzdan jetken ósıet, urpaq boıyna meıirim men qamqorlyq dánin sebetin asyl sóz. Dál osy qaǵıdany «Samruk-Kazyna Trust» qory Jumysshy mamandyqtar jylynda «Samruk Umiti» jobasy arqyly júzege asyrdy. Bastamanyń alǵashqy nátıjeleri Pavlodarda ótken respýblıkalyq jastar forýmynda tanystyryldy. Onda joba qatysýshylary Premer-mınıstrdiń orynbasary Ermek Kósherbaevpen kezdesti.
Forýmda qordyń biryńǵaı qaıyrymdylyq operatory «Samruk-Kazyna Trust» qorynyń bas dırektory Alfııa Adıevanyń aıtýynsha, 9-synypty bitirip, kolledjge túsýdi josparlap otyrǵan 40 tárbıelenýshiniń 30-y suranysqa ıe tehnıkalyq jáne jumysshy mamandyqtardy tańdaǵan.
«Joba bastaǵan kezde 9-synyp oqýshylarynyń arasynan tehnıkalyq mamandyqtarǵa qyzyǵýshylyq tanytqan nebári 11 jasóspirim boldy. Búginde túrli kásibı baǵdarlaý sharalarynyń jáne mentorlardyń kómegimen búginde eńbek mamandyqtaryn tańdaǵan jastardyń sany 30-ǵa jetip otyr. Bul – júıeli kásibı baǵdar berý jastardyń oı-sanasyn ózgertip, bolashaqqa degen senim beretinin kórsetetin naqty nátıje», dedi Alfııa Adıeva.
Pavlodar men Shyǵys Qazaqstan oblystaryndaǵy balalar úılerinen iriktelgen 100 jasóspirim keshendi baǵdarlama aıasynda kásiptik baǵdarlaý testileýinen ótti, múddeler kartasyn jasady, eńbek naryǵy men naqty bos jumys oryndarymen tanysty. Sondaı-aq qarjylyq jáne quqyqtyq saýattylyq, tulǵalyq damý baǵytynda daǵdylar qalyptastyrdy. Árqaısysyna jeke tálimger men kýrator bekitilip, senimdi baılanys ornatyldy.
Jastar teorııany tájirıbemen ushtastyryp, jetekshi ónerkásiptik kásiporyndar men kolledjderge baryp, jumys ornyn kózben kórip, mamandarmen tildesti. Oqýdy aıaqtaǵan barlyq bala «Samuryq-Qazyna» qorynyń kompanııalar tobyna jumysqa ornalasý múmkindigine ıe bolady.
Joba aıasynda kásibı baǵdary ǵana emes, ómirlik kózqarasy ózgergen jastyń biri – Shamıl Mehnovsev. Pavlodardaǵy balalardy qoldaý óńirlik ortalyǵynyń tárbıelenýshisi tehnık-mehanık mamandyǵyna kolledjge túsýge bel býyp otyr.
«Negizi tehnıkalyq mamandyqtarǵa jaqynmyn. Kásiporyndarǵa barǵanda mamandarmen kezdesip, kásiptiń qyr-syrymen tanysýǵa tyrystym. Bastysy osy baǵytty sanaly túrde tańdadym. О́zime unaıdy. Jaqsy maman atanǵym keledi», deıdi bolashaq stýdent.
Al óskemendik Lıýdmıla tehnolog mamandyǵyn ıgerip, sheber atanǵysy keledi.
«Alǵashynda shashtaraz bolǵym kelgen. Biraq kóp oılanyp, úsh túrli mamandyqtyń arasynan tańdaý jasaý qıyn boldy. Sońynda júregime jaqyn tehnolog mamandyǵyn tańdadym. «Samuryq-Qazyna» ózime unaıtyn mamandyqty tańdaýǵa kómektesti. Kolledj ókilderi mektepke kelip, mamandyqtar týraly aıtyp, ekskýrsııa uıymdastyrdy. Bul joba bizge turaqty bolashaq qurýǵa múmkindik berip otyr», deıdi ol.
Aldaǵy jańa oqý jylynda qor bastamashylary kolledjdermen, kásiporyndarmen kelisim jasap, árbir bala tolyq qamqorlyqqa alynady. Sonymen qatar «Samuryq-Qazyna» óńirlik jastar keńesteriniń músheleri balalarǵa tálimger atanyp, kásibı sheberlikti shyńdaýǵa járdemdesedi.
Uly Abaı «Eldi el, adamdy adam etetin tek eńbek» degen. «Samruk Umiti» dál osy qaǵıdany basshylyqqa alyp, jastardy eńbeksúıgishtikke, kásibı damýǵa, óz bolashaǵyn óz qolymen qurýǵa jeteleıdi.
Merýert ShÝKÝEVA