Tamyz konferensııasy negizinen úlken eki bólikten turdy. Birinshisi – paneldik seksııalar, ekinshisi – plenarlyq otyrys. Bıyl paneldik seksııalardyń sany burynǵydan áldeqaıda kóp boldy.
Endi jańashyldyqtarǵa toqtalsaq, birinshi ret «zertteýshi» jáne «pedagog sheber» sanatyn rastaǵan pedagogter attestattaý testinen bosatylady. Biraq sonyń esesine olar 5 jyl ishinde óziniń tájirıbesin taratyp, sheberligin kórsetip, áriptesterine ádistemelerin dáleldeýi kerek. Memlekettik grantta oqyǵan, dıplomyndaǵy GPA kórsetkishi 3,33-ten joǵary bolsa, kez kelgen mektepke konkýrssyz jumysqa qabyldana alady.
Qazaqstan Respýblıkasynda jalpyǵa mindetti bilim standarty bar. Bıyl qańtarda sol qujatqa ózgerister engizildi. Bul ózgerister 2027 jyldyń 1 qyrkúıeginen bastap kúshine enedi. Oǵan deıin osy jańalyqtar týraly qoǵamǵa, ata-analarǵa, pedagog qaýymǵa túsindirip, ózgeristerdi qanatqaqty joba retinde aprobasııadan ótkizemiz. Álemdik bank óz zertteýleriniń nátıjesinde Qazaqstandaǵy mektep oqýshylarynda oqý júktemesi tym kóp, aýyr ekenin kórsetken. Osyǵan oraı jańartylǵan standart negizinde biz mektepterge erkindik bergeli otyrmyz. Bul – álemdik tájirıbe. Mysaly, qazir elimizdegi memlekettik mektepterde 15 mindetti pán bar, sonyń sanyn 8 pánge azaıtamyz, qalǵan 7 pán tańdaý páni bolady. Sonda pedagogıkalyq ujym, synyp, ata-ana qaýymdastyǵy birlesip, sol 7 pánniń qaısysyn oqıtynyn tańdaıdy. Aıtalyq, bir synyp túgelimen gýmanıtarlyq baǵytty tańdaıtyn shyǵar, olar soǵan sáıkes kerek pándi aptalyq oqý júktemesinen asyrmaı ózderi irikteıdi. Eger tańdaý baǵyty eki bólek bolsa, bir synyp ekige bólinip tańdaý jasaı alady. 2027 jyly kúshine enetin standartta qoǵamda qyzý talqylanyp jatqan algebra men geometrııa pánderine qatysty aıtaıyq. Negizi bir nárseni eskerý kerek, TMD elderinen basqa memleketterde geometrııa degen pán joq. Osy eki pándi matematıka pánine kiriktirip, mektepterdiń ózine tańdaýǵa múmkindik beremiz, eger oqı beremiz dese, oqı beredi. Standartqa qatysty taǵy bir ózgeris tárbıe máselesine baılanysty. Qazir oqýshylardyń tárbıesine synyp jetekshisi, dırektordyń tárbıe jónindegi orynbasary ǵana jaýapty. Endi sol standart talabyna sáıkes ár pedagog ózi júrgizetin oqý úderisinde ulttyq qundylyqqa negizdelgen tárbıe úlgilerin paıdalanyp, josparyn soǵan qaraı qurýy qajet.
Qanybek JUMAShEV,
Oqý-aǵartý mınıstrligi Orta bilim berý komıtetiniń tóraǵasy