Qazaqstanda Sport kúnine oraı quttyqtaý sózin Týrızm jáne sport mınıstri Erbol Myrzabosynov joldady, dep habarlaıdy Egemen.kz.
Mınıstr bul merekeniń maqsaty – salaýatty ómir saltyn nasıhattaý, buqaralyq sportty damytý jáne halyq densaýlyǵyn nyǵaıtý ekenin atap ótti.
«Sport – bul tek fızıkalyq belsendilik emes, ol – erik-jigerdiń, maqsatqa umtylystyń, dostyq pen birliktiń kórinisi. Memleket basshysy Qasym-Jomart Toqaevtyń qoldaýymen elimizdegi sporttyq múmkindikter jyl saıyn keńeıip keledi», – dedi mınıstr.
Erbol Myrzabosynovtyń aıtýynsha, sońǵy jyldary elimizde birqatar mańyzdy qadamdar jasaldy:
Jańa sport nysandary óńirlerde ashylyp jatyr; Qazaqstandyq sportshylar halyqaralyq arenalarda tabysty óner kórsetýde; 2025 jyldan bastap sport salasyndaǵy zańnamaǵa eleýli ózgerister engizildi; Parasport pen buqaralyq sportty qoldaýǵa erekshe kóńil bólindi; Ulttyq sport túrlerin damytýǵa qarjy baǵyttaldy.Mınıstr Qazaqstannyń sporttaǵy bedeli artyp kele jatqanyn atap ótti.
«Bıyldyń ózinde elimizge jıyrmaǵa jýyq halyqaralyq sport uıymdarynyń ókilderi keldi. Olardyń jartysyn Memleket basshysy jeke qabyldady. Bul – Qazaqstannyń sporttaǵy abyroıynyń óskenin dáleldeıdi», – dedi ol.
Sonymen qatar 2025 jyly elimizde birneshe iri halyqaralyq týrnır uıymdastyrylǵanyn, qazaqstandyq sport nysandarynyń qazirgi zaman talabyna saı ekenin jetkizdi.
Erbol Myrzabosynov barlyq qazaqstandyqtardy merekemen quttyqtap, densaýlyq, sergektik jáne jańa jeńister tiledi.
«Búgingi jetistikter – jattyqtyrýshylardyń, sport ardagerleriniń, jankúıerlerdiń jáne barsha sport súıer qaýymnyń ortaq eńbegi», – dedi mınıstr.