Danııanyń bilim júıesinde erekshe bir sabaq bar. Ol – «Klassens tid», qazaqshalasaq, «Synyp saǵaty». Bul dástúr 1993 jyldan beri úzilmeı keledi. Aptasyna bir ret 6 jastan 16 jasqa deıingi balalar synybynda bas qosyp, bir-birimen erkin áńgimelesedi.
Bul ýaqyt olardyń júrektegi muńdy, qýanyshty, oıdy bólisýge arnalǵan. Bir oqýshy úıdegi qıyndyqtaryn jasyrmaı aıtady, bireýi dostarymen renjiskenin jetkizedi, al endi bireýi kishkentaı jetistigimen qýantady. Al muǵalim bul jerde tórelik aıtýshy emes, tyńdaýshy, baǵyt berýshi. Balalarǵa bir-birin túsiný, janashyrlyq tanytý, qoldaý kórsetý úıretiledi. Keıde olar osy áńgimeni ózderi pisirgen torttaryn jep otyryp jalǵastyrady. Bul dattarǵa tán «hygge» – qarapaıym jylylyq pen janǵa jaılylyqtyń belgisi.
Eń qyzyǵy, Danııa zańdarynda «empatııa» jeke pán retinde kórsetilmegenimen, ol balabaqshadan bastap barlyq bilim júıesine engen. Arnaıy «Step by Step», «CAT-kit» baǵdarlamalary arqyly balalar emosııany tanýdy, sezimdi jetkizýdi, júzdegi ózgeristerdi ańǵara bilýdi úırenedi.Sondyqtan ár bala óz sezimin túsinip qana qoımaı, ózgelerdiń de jaǵdaıyna úńile alatyn tulǵa bolyp qalyptasady. Danııadaǵy bilim berýdiń basty maqsaty – balany tek aqyldy emes, jaqsy adam etip tárbıeleý.
Danııa qoǵamynda empatııa tek mekteppen shektelmeıdi. Ol adamdardyń kúndelikti qarym-qatynasynda, eńbek ornynda, otbasynda da kórinis tabady. Sol sebepti de bul el álemdik reıtıngte únemi «eń baqytty memleketterdiń» qatarynda júredi. Sarapshylardyń aıtýynsha, baqyttyń syry – bir-birin tyńdaı biletin, túsinýge daıyn qoǵam qurýda. Bir-biriniń qýanyshyn qyzǵanbaıtyn, qaıǵysyn bólise biletin adamdardan senimge toly orta qalyptasady.