Jańa oqý jyly qarsańynda Oqý-aǵartý mınıstri Ǵanı Beısembaev Shymkent qalasyndaǵy birneshe bilim berý mekemelerinde bolyp, olardyń jumysymen tanysty. Sapar barysynda mınıstr mektepterdiń qaýipsizdigi, pedagogtermen qamtylýy, oqýshylardy tamaqtandyrý júıesi jáne zamanaýı ınfraqurylymnyń damýy sııaqty negizgi máselelerge erekshe kóńil bóldi, dep habarlaıdy Egemen.kz.
Oqý-aǵartý mınıstrliginiń habarlaýynsha, qazir qala mektepterindegi qaýipsizdik deńgeıi aıtarlyqtaı artqan. Barlyq oqý oryndary beınebaqylaý kameralarymen jabdyqtalyp, IIM Jedel basqarý ortalyqtaryna qosylǵan. Budan bólek, jazbalar ákimdiktiń Ahýaldyq ortalyǵyna da berilip, jaǵdaıdy onlaın baqylap, kez kelgen táýekelge jedel áreket etý múmkindigi jasalǵan.
«Mektep ınfraqurylymynda da úlken ózgerister oryn alýda. Memleket basshysynyń bastamasymen iske asyrylyp jatqan «Keleshek mektebi» ulttyq jobasy aıasynda Shymkentte 12 jańa mektep salyndy. Solardyń biri – 2030 oqýshy bilim alatyn №144 mektepke mınıstr arnaıy bardy. Mınıstrdiń aıtýynsha, jańa mektepterdiń qurylysy tyǵyz ornalasqan shaǵyn aýdandardaǵy júktemeni azaıtyp, árbir balaǵa jaıly jaǵdaı jasaýǵa septigin tıgizedi», delingen habarlamada.
Sonymen qatar qala ákimi úsh aýysymdy oqytý máselesi tolyǵymen sheshilgenin habarlady.
Sonymen qatar bilim berý uıymdaryn jańǵyrtý jumystary da jalǵasyp jatyr. Renovasııa baǵdarlamasy sheńberinde qaladaǵy 11 mektep jóndeýden ótedi. Máselen, Saıram turǵyn alabyndaǵy №109 mektepte kúrdeli jóndeý aıaqtalyp, oqý orny zamanaýı ári qaýipsiz talaptarǵa saı jańartylǵan.
Pedagogtermen kezdesken mınıstr mekteptiń oqýshylar úshin jaıly orta ǵana emes, muǵalimder úshin kásibı damýdyń ortasy bolýy qajettigin atap ótken. Sondaı-aq, memleket ustazdarǵa jan-jaqty qoldaý kórsetip otyrǵanyn jetkizdi.
Inklıýzıvti bilim berý máselesi de nazardan tys qalǵan joq. Mınıstr Saıramdaǵy kómekshi mektep-ınternaty-kolledjinde bolyp, erekshe bilim qajettilikteri bar balalarǵa jasalǵan jaǵdaılardy kórgen. Qazirgi tańda Shymkentte ınklıýzıvti bilim berýmen qamtý deńgeıi balabaqshalarda – 96%, mektepterde – 95%-ǵa jetken. Bul baǵytta «Erekshe bilimdi qajet etetin balalardy keshendi qoldaý týraly» zań jobasy ázirlenip jatyr.
Sonymen qatar mınıstr Shymkent agrarlyq-tehnıkalyq kolledjinde bolyp, stýdentterdiń oqý jaǵdaıy men materıaldyq-tehnıkalyq bazasymen tanysqan.