QR-nyń Zańnama jáne quqyqtyq aqparat ınstıtýtynyń dırektory, zań ǵylymdarynyń doktory, professor Indıra Áýbákirova 2022 jyly qabyldanǵan konstıtýsııalyq túzetýler týraly aıta otyryp, jańartylǵan Konstıtýsııa Qazaqstandaǵy konstıtýsıonalızmniń jańa kezeńin bastaýǵa negiz bolǵanyn atap ótti, dep habarlaıdy Egemen.kz.
«Búginde bul normalardyń barlyǵy qoǵamymyzdy, saıası júıemizdi, azamattyq qoǵam ınstıtýttaryn ilgeri jyljytyp jatyr dep senimmen aıta alamyz», dedi ol Astanada ótken 2022 jylǵy konstıtýsııalyq túzetýlerge túsindirmeniń 2-basylymynyń tusaýkeseri barysynda.
QR-nyń Konstıtýsııasyna ózgerister men tolyqtyrýlar engizý jónindegi Jumys tobynyń múshesi retinde Indıra Áýbákirova Prezıdent ınstıtýtyna qatysty birqatar jańashyldyqtarǵa toqtaldy.
Atap aıtqanda, Prezıdent bir ret qana 7 jyl merzimge saılanady. Sondaı-aq, endi Prezıdent oblystardyń, respýblıkalyq mańyzy bar qalalardyń jáne elordanyń ákimderin máslıhat depýtattarynyń kelisimimen taǵaıyndaıdy. Bul rette Prezıdent keminde eki kandıdatýra usynady, olardyń ishinen daýys berý arqyly tańdaý jasalady.
«Taǵy bir erekshe atap ótetin jańashyldyq – Prezıdenttiń partııada bolmaýy. Bul bastamany Memleket basshysy ózi kóterdi, biz ony Konstıtýsııalyq erejege aınaldyrdyq. Prezıdenttiń partııadan tys ári saıası turǵydan beıtarap bolýy saıası júıede azamattardyń quqyqtary men bostandyqtarynyń qorǵalýyn kúsheıtedi. Osy jańashyldyqtar engizilgennen keıin, bizde kóptegen baǵyttar boıynsha ádiletti ári adamnyń qajettilikterine basymdyq beretin qoǵam men memleketti qalyptastyratyn jańa baǵdarlar aıqyndaldy», dep atap ótti Zańnama jáne quqyqtyq aqparat ınstıtýtynyń dırektory.