23 qazannan bastap el kınoteatrlarynda Shámshi Qaldaıaqovtyń 95 jyldyǵy aıasynda túsirilgen «Baqyt qushaǵynda» jańa mıýzıkli usynylady. Kınokartına bastan-aıaq uly kompozıtordyń ánderimen súıemeldengen. Kúrdeli ári qyzyqty janrdaǵy týyndynyń bas prodıýseri ári rejısseri – New York Film Academy túlegi Sanat Shapashov.
Rejısserdiń aıtýynsha, fılm úshin arnaıy Sh.Qaldaıaqovtyń 13 áni sımfonııalyq orkestr súıemelimen jazylyp, saýndtrek retinde usynylady. Týyndynyń shyǵarmashylyq tobyna kompozıtordyń uly Muhtar Qaldaıaqov pen kelini Botagóz Qaldaıaqova da qoldaý kórsetken. Aıta keteıik, atalǵan mıýzıkl – rejısserdiń debıýti.
«Baqyt qushaǵynda» mıýzıklinde Shámshiniń shyǵarmashylyǵy, qazaqtyń tili, óneri men Astananyń sulýlyǵy kórsetiledi.
«Jalpy, negizgi basty maqsatymyz, negizgi ıdeıamyz – elordamyzdy, mádenıetimizdi kórsetý. О́ıtkeni sońǵy tolyqmetrajdy fılm Astanada 15 jyl buryn túsirilgen. Basty ıdeıam, maqsatym – elimizge, múmkin búkil álemge bizdiń elordamyzdy, mádenıetimizdi tanytý», deıdi Sanat Shapashov.
Aıta keteıik, djýkboks mıýzıkl degenimiz – tanymal ánderdi paıdalanatyn sahnalyq qoıylym nemese mýzykalyq fılm.
«Kastıng óte aýqymdy ótti. Eki myń bıshiniń ishinen 50-i ǵana tańdaldy. Úzdikterdiń úzdigi, ádemilerdiń ádemisi ǵana qatysty. О́ıtkeni bul – mıýzıkl. Úsh janrdy qamtıdy: akterlik, bı jáne án», deıdi horeograf Ýálıtbek Sııazbek.
Týyndynyń basty rólderin Dáýren Serǵazın, Álııa Ánýarbek, Shahmurat Ordabaev, Azamat Satybaldy, Aıgúl Imanbaeva, Aınur Ilıasova somdaıdy.