Prezıdent Joldaýynda ekonomıka salasyna qatysty aıtylǵan máselelerdiń eń mańyzdysy – ınvestısııa tartý. Qasym-Jomart Kemeluly elge kelip jatqan ınvestısııanyń kóp bóligi shıkizat salasyna baǵyttalatynyn, bul elimizdiń damýyna oń yqpalyn tıgizip jatqanymen, endi syrttan keletin qarjyny óndiris salasyna kóbirek burý qajettigin basa aıtty.
Bul – árıne, burynnan qolǵa alynyp, atqarylyp jatqan jumys. Alaıda oıdaǵydaı deńgeıde emes. Sondyqtan Memleket basshysy ınvestısııa tartý úshin Úkimetke jeńildikterdi qarastyrý máselesin tapsyrdy.
Ekinshi úlken másele – óndirilgen shıkizatty tereń óńdeý máselesi. Munyń ishinde tústi metallýrgııa salasyna toqtalyp ótti. Sonymen qatar aýyl sharýashylyǵy jaıynda da aıtty. Qazirgi tańda tústi metallýrgııa salasynda ónimniń bári, munaıymyz ben gazymyz da shıkizat retinde shetelge ketip jatyr. Máselen, qazir elimizde úsh munaı óńdeý zaýytymyz bar. Sonyń biri turyp qalsa, elde janar-jaǵarmaı problemasy týyndaıdy. О́zimiz munaıdyń ortasynda otyryp, óńdelgen munaı ónimderine jarymaı jatatynymyz ras. Munyń bári – jerimizdiń astynan shyǵyp jatqan baılyǵymyzdy ózimizde óńdemeýdiń kesiri.
Sonymen qatar Prezıdent Joldaýda kólik-logıstıka máselesin sheshý jóninde tapsyrma berdi. Biz – toǵyz joldyń torabynda turǵan elmiz. Eýrazııanyń tranzıttik habyna aınalý áleýetimiz joǵary. Degenmen bul maqsatqa jetý úshin tasjoldardyń qaýipsizdigi, temirjolda vagondardyń jetispeýshiligi, shekara beketterindegi qozǵalystyń retke kelýi sekildi máseleler sheshimin tabýǵa tıis. Buǵan qosa qazir elimizde beketter jóndeýden ótip jatyr. Kaspıı teńizi arqyly alys-beris pen barys-kelisti arttyrý jaıyna da keńinen toqtaldy.
Prezıdent bıyl da ádettegideı qoǵam nazaryn aýdaratyn bastamalary men oılaryn ortaǵa saldy. Onyń ishinde bilim berý, mádenıet, óner, densaýlyq saqtaý salalary da qamtyldy. Qaı salany alsaq ta, sheshimin kútken másele kóp. Jetistikterimiz de az emes. Memleket basshysy aldymyzǵa qoıǵan mindetterdi talapqa saı júzege asyryp, eńbek ete bersek, ádiletti de gúldengen Qazaqstandy qurýǵa tolyq múmkindigimiz bar.
Álibek NÁÝTIEV,
Senat depýtaty