Prezıdent janyndaǵy Qazaqstannyń strategııalyq zertteýler ınstıtýtynyń uıymdastyrýymen «KISI GPS: Gylym. Pikir. Sayasat» ulttyq saraptamalyq alańynda «Prezıdent Joldaýy: Qazaqstan damýynyń aldaǵy baǵyttary» taqyrybyndaǵy otyrys ótkizildi. Oǵan memlekettik organdardyń, taldaý ortalyqtarynyń, joǵary oqý oryndarynyń, ǵylymı qaýymdastyqtyń ókilderi qatysty.
Sarapshylar sıfrlandyrý men jasandy ıntellektini damytý, ınstıtýsıonaldyq reformalar, memlekettik basqarýdy jańǵyrtý, ınvestısııalar men óńirlik damý syndy Joldaýda kórsetilgen negizgi baǵyttardy talqylady. Sondaı-aq bilim salasynyń róli men áleýmettik bastamalarǵa da aıryqsha toqtaldy.
Otyrysqa moderatorlyq etken QSZI dırektory Jandos Shaımardanov Prezıdent Qasym-Jomart Toqaevtyń Joldaýy eldiń saıası, ekonomıkalyq jáne áleýmettik damýyna strategııalyq baǵyt silteıtinin atap ótti.
– Rasynda, Prezıdent bastamashy bolǵan saıası ózgerister túbegeıli sıpatqa ıe jáne jańa saıası dástúrler men jańa saıası mádenıetti qalyptastyrýǵa negiz bolady. Bul óz kezeginde elimizdiń ári qaraıǵy saıası jańǵyrýynyń irgetasy bolmaq, – dedi J.Shaımardanov.
Otyrysta alǵash bolyp Astana memlekettik qyzmet haby Basqarýshy komıtetiniń tóraǵasy Álıhan Baımenov sóz sóılep, bul Joldaý shynynda da strategııalyq sıpatqa ıe ekenin atap ótti.
– Qazirgi tańda zaman talabyna saı memleketter men ulttar jahandyq básekelestik jaǵdaıynda óz áleýetin kúsheıtip, uzaqmerzimdi turaqty damýǵa kóshý úshin birneshe basty faktorǵa nazar aýdarýy qajet. Birinshiden, bul – adam faktory, ıaǵnı qundylyqtar men mádenıet, adam kapıtaly. Ekinshiden, tehnologııalyq faktorlar, sonyń ishinde jasandy ıntellekt pen sıfrlandyrý. Úshinshiden, ınstıtýsıonaldyq saıası júıe faktory. Prezıdent Joldaýy osy úsh baǵytty da qamtyǵan keshendi qujat boldy jáne bulardyń árqaısysynyń ózindik orny bar, – dedi Á.Baımenov.
Sondaı-aq ol Joldaýdyń saıası reformalarǵa qatysty tusyna erekshe toqtaldy.
– Prezıdent atap ótkendeı, bir palataly Parlamentke kóshý – saıası júıeniń turaqtylyǵyn arttyrady. Qazirgi qoldanystaǵy Konstıtýsııada eki palatanyń arasynda qaıshylyqtar týyndap, keıde saıası kúızelisterge de sebep bolýy múmkin. Senat óz fýnksııasyn oryndady, alaıda onyń engizilýi negizinen sheteldik tájirıbege jaqyndastyrý maqsatynda bolǵany belgili. Sonymen qatar ol keı jaǵdaıda Májilistiń qyzmetin tejeıtin kúsh retinde qarastyryldy. Degenmen bir palataly Parlament memleketimizdiń ýnıtarlyq tabıǵatyna jaqyn ári saıası júıeniń turaqtylyǵyn kúsheıtedi. Budan bólek, partııalardyń damýyna da jańa serpin beredi, – dedi saıasatker.
Sonymen qatar ol, ókinishke qaraı, qazirgi ýaqytta elimizdegi saıası partııalar tolyq qalyptasyp úlgermegenin ashyp aıtyp, partııalardyń aldynda úlken mindet turǵanyn da atap ótti.
Prezıdent janyndaǵy QSZI ǵalym hatshysy Aıgúl Kósherbaeva Joldaýda kóptegen mańyzdy másele kóterilgenin, sonyń ishinde áleýmettik saıasat salasyna toqtaldy.
– Bul másele memleket úshin eń úlken shyǵyndardyń biri ekeni belgili. Indeksasııa, sýbsıdııa sııaqty túrli qoldaýlar bıýdjetke aıtarlyqtaı salmaq túsirip otyr. Prezıdent atap ótkendeı, áleýmettik kómekti alatyn adamdardyń sanatyn qaıta qaraý qajet. О́ıtkeni keıbir adamdar shyn máninde kómekke muqtaj bolsa, endi bireýler masyldyq psıhologııaǵa boı aldyryp otyr. Sol sebepti osy sanatty qaıta qarap, shynaıy muqtaj jandarǵa ǵana qoldaý kórsetý mańyzdy. Bul qadam, bir jaǵynan, bıýdjetke túsetin aýyrtpalyqty jeńildetse, ekinshi jaǵynan, ekonomıkalyq damýǵa baǵyttalatyn qarajatty kóbeıtýge múmkindik beredi. Árıne, muny júzege asyrýda basty qural – sıfrlandyrý. Eger áleýmettik saıasatta sıfrlyq júıelerdi keńinen engizsek, ádil ári tıimdi sheshimder qabyldanady, – dedi QSZI ǵalym hatshysy.
Sondaı-aq Strategııalyq josparlaý jáne reformalar agenttigi tóraǵasynyń orynbasary Syrymbet Qaskeev, «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov, Astana IT University sıfrlyq memlekettik basqarý mektebiniń dekany Altaır Ahmetov, Nazarbaev ýnıversıteti janyndaǵy Aqyldy júıeler jáne jasandy ıntellekt ınstıtýtynyń (ISSAI) atqarýshy dırektory Erbol Absalıamov sóz sóılep, Joldaýdyń basym baǵyttarynan oı órbitti.
Jıyndy túıindegen Jandos Shaımardanov sarapshylar pikirleri Prezıdent Joldaýyn júzege asyrýdyń tıimdi tásilderin qalyptastyrýǵa negiz bolatynyn atap ótti.