Prezıdent bıylǵy Joldaýynda aýyl sharýashylyǵyna jaýapty sheneýnikterge syn aıtty. Qazirgi ahýaldy aıtýǵa uıat dep baǵalady. Rasynda, qudaı bergen ulan-baıtaq jerimiz bar. Mal sharýashylyǵyn, egin sharýashylyǵyn damyt ta, óz-ózińdi asyra. Qazir Qazaqstan shetelden mıllıardtaǵan dollarǵa azyq-túlik ımporttaıdy. Tipti, sonaý Argentına sekildi shalǵaıdaǵy memleketterden et ákeledi ekenbiz.
Memleket basshysy jaýapty mınıstrlikke agrobıznesti qoldaý josparyn ázirlep, naqty qarjylandyrý sharalaryn bastaýdy tapsyrdy. Sondaı-aq ishki naryqty etpen tolyq qamtamasyz etý qajet ekenin naqtylady. Eksportty da umytpaý qajet. Eger mal sharýashylyǵyn durys damytsaq, ózimizdi ǵana emes, kórshi elderdi de etpen qamtamasyz etýge áleýetimiz jetedi.
Menińshe, et baǵasyn baqylaýdan bosatý qajet. Qazir memleket ettiń asa qymbattap ketpeýin qadaǵalap otyr. Alaıda bul mal ósiretinderge tıimsiz. Mal baǵý – ońaı sharýa emes. Jem-shóbi, basqa da shyǵyndary bar. Eger ettiń baǵasyn baqylaýdan bosatsa, árıne, qymbattaıdy. Biraq aýyl sharýashylyǵymen aınalysatyndarǵa tıimdi bolady. Bul sheshim kópshilikke unamaýy múmkin. Alaıda basqa amal joq. О́ıtkeni kórshi elderde ettiń baǵasy – qymbat. Al kúnniń sýyǵyna tońyp, ystyǵyna kúıip, tańnan qara keshke deıin mal sońynda júrgen adamǵa eńbegińdi arzanǵa sat dep qalaı aıtasyń?
Memleket basshysy Úkimetke Eýrazııa aýmaǵyndaǵy saýda-sattyqtyń ádil jaǵdaıda jasalýyn da naqty dálelmen talap etýdi mindettedi. Baıqasaq, qazir «Magným» sekildi saýda jelilerinde reseılik ónimder kóbeıip ketti. Ásirese sút ónimderi óte kóptep ımporttalyp jatyr. О́tkende ózimizdiń «3 jelanııa» maıonezin tappaı qoıyp edik. Ornyna reseılik ónim qaptapty. Mundaı tásil ishki bıznesti qurdymǵa jiberedi. Sondyqtan Prezıdent óte durys másele kóterip otyr.
Prezıdent bul máseleni bılikke dıplomatııalyq jolmen jetkizdi. Sondyqtan aýyl sharýashylyǵy salasyna jaýapty sheneýnikter bul synnan qorytyndy shyǵarady dep úmittenemiz.
Qazbek MAIGELDINOV,
saıasattanýshy