Memleket basshysynyń Qazaqstan halqyna Joldaýy – «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» aıasynda týrızmdi damytý jumysynyń ózektendirilýi qaraldy.
Premer-mınıstrdiń orynbasary Ermek Kósherbaev ortalyq memlekettik organdar men óńirlerdiń ókilderimen keńes ótkizdi. Kezdesý barysynda týrızm máseleleri men týrıstik aımaqtardyń jaǵdaıy boıynsha Prezıdenttiń tapsyrmasyn júzege asyrý týraly esepter tyńdaldy. Sonymen qatar eldiń negizgi týrıstik destınasııalaryna jasalǵan issaparlardyń nátıjesi usynyldy.
Ermek Kósherbaev qabyldanyp jatqan sharalardyń jetkiliksiz ekenin atap ótip, ınfraqurylymdy damytý men týrıstik nysandardaǵy kórsetiletin qyzmetterdiń sapasyn arttyrý jumysyn jedeldetýdiń mańyzdylyǵyn erekshe kórsetti. Memleket basshysynyń jańa tapsyrmalaryn eskere otyryp, aldaǵy jazǵy maýsymǵa kýrorttyq aımaqtardy daıarlaýǵa basa nazar aýdaryldy.
«Týrızmdi damytý – bul tek qana ekonomıkalyq úles emes, sonymen qatar eldiń halyqaralyq ımıdjin nyǵaıtýdyń, ınvestısııalyq tartymdylyǵyn arttyrýdyń jáne óńirlerdi damytýdyń mańyzdy faktory. Osy maqsattarǵa qol jetkizý úshin zamanaýı ınfraqurylym salýmen qatar, álemdik ozyq tájirıbelerge sáıkes keletin joǵary servıs standarttaryn qalyptastyrý qajet», dedi Premer-mınıstrdiń orynbasary.
Úkimet týrızmdi ulttyq ekonomıkanyń negizgi draıverleriniń biri retinde qarastyrady. Mańyzdy shart retinde shaǵyn jáne orta bıznestiń belsendi qatysýy, sondaı-aq otandyq jáne sheteldik týrısterge qyzmet kórsetý isine halyqtyń keń aýqymyn tartý qajettiligi ataldy.
Jıyn qorytyndysy boıynsha memlekettik organdarǵa kýrorttyq aımaqtardyń abattandyrý standarttary men týrısterdiń qaýipsizdigin qamtamasyz etý, sheteldik qonaqtarǵa pasporttyq baqylaý rásimderin jeńildetý, suranysqa ıe áýe baǵyttaryna halyqaralyq loýkosterlerdi tartý, sondaı-aq týrıstik qyzmetterdiń sapasyn arttyrýǵa baǵyttalǵan birqatar basqa da sharalardy júzege asyrý tapsyryldy.