Astana qalasynda Memlekettik keńesshi Erlan Qarınniń tóraǵalyǵymen Prezıdent janyndaǵy Jastar saıasaty jónindegi keńestiń otyrysy ótti. Oǵan múddeli ortalyq memlekettik organdardyń ókilderi, respýblıkalyq jastar uıymdarynyń kóshbasshylary qatysty.
Jıynda Ishki ister mınıstriniń birinshi orynbasary Baýyrjan Álenovtiń nashaqorlyqqa qarsy is-qımyl sharalaryn iske asyrý qorytyndylary týraly esebi tyńdaldy. Budan bólek, 2026–2028 jyldarǵa arnalǵan Nashaqorlyqqa jáne esirtki bıznesine qarsy kúres jónindegi keshendi jospardyń jobasy usynyldy.
Talqylaý barysynda Keńes músheleri men jastar uıymdarynyń jetekshileri nashaqorlyqtyń aldyn alý jáne oǵan qarsy is-qımyl máselelerine qatysty oı-pikirleri men usynystaryn aıtty.
Erlan Qarın búginde nashaqorlyqqa qarsy kúres jumystary júıeli túrde júrgizilip jatqanyn ári qazirdiń ózinde naqty nátıjeler baıqalyp otyrǵanyn atap ótti.
Memlekettik keńesshi nashaqorlyqqa qarsy kúres árdaıym Prezıdenttiń erekshe nazarynda ekenin eske saldy. Sondaı-aq Qaýipsizdik Keńesiniń sońǵy otyrysynda Memleket basshysy esirtkini taratpaýǵa baǵyttalǵan keshendi sharalar qabyldaýdy jáne bul iske jastar uıymdary men eriktilerdi tartýdy tapsyrǵanyn jetkizdi.
Sonymen qatar Erlan Qarın nashaqorlyqqa qarsy kúreste memlekettik organdar men qoǵamdyq uıymdardyń birlesken kúsh-jigeri arqyly ǵana oń nátıjege qol jetkizýge bolatynyn atap ótti.
Otyrys qorytyndysy boıynsha naqty usynymdar ázirlenip, kóterilgen máseleler týraly memlekettik organdarǵa arnaıy tapsyrmalar berildi.