Búginde qoǵamǵa qyzmet – el múddesine jumylǵan jaýapkershiliktiń ólshemine, shynaıy qaıratkerlik – halyqtyń bereke-birligi men damýyn oılaǵan isker de bilikti azamattyń kásibı sapasyna aınaldy. Ádette, jurtshylyq atqarýshy bılik pen qoǵamnyń arasyna bilim, mádenıet, aqparat, zań, saıasattaný, t.b. gýmanıtarlyq sala azamattary dáneker bolsa eken deıdi.
Mine, sondaı dáneker tulǵanyń biri – professor, saıasattanýshy, memleketshil menedjer Zulfýhar Ǵaıypov. Elge qaltqysyz qyzmet etip, memleket damýyna aıanbaı atsalysyp júrgen osy azamattyń bel-belesine kóz júgirtsek, elimizdiń jetekshi joǵary oqý orny – Ál-Farabı atyndaǵy Qazaq ulttyq ýnıversıteti men Prezıdent janyndaǵy Memlekettik qyzmet akademııasyna deıingi salıqaly bilim ordalarynyń ónegeli mektebi oıǵa oralady. Ol QazMÝ-dy úzdik bitirip, ǵylymı qyzmetke qaldyrylǵan kezden bastap, Táýelsiz Qazaqstannyń órkendeýine bilim-biligimen, paıym-parasatymen úles qosyp keledi.
Fılosofııa jáne saıasattaný fakýltetindegi jıyrma jylǵa jýyq eńbek tájirıbesi Zulfýhar Sultanulynyń ustazdyq, uıymdastyrýshylyq, zertteýshilik bel-belesterin kórsetti. Jas ǵalymdar keńesin basqara júrip, jańa býyndy JOO mádenıetine, ǵylymǵa tarta bildi.
Bilim jáne ǵylym mınıstrliginde joǵary oqý oryndardyń dekan, prorektor, rektor qyzmetinde júrgen bilikti mamandardy sala basshylyǵynyń túrli laýazymdy qyzmetine tartý dástúr qalyptasqan edi. Táýelsizdik tusyndaǵy elimizdiń tuńǵysh jekemenshik joǵary oqý orny – «Qaınar» ýnıversıtetinde rektorlyq qyzmette júrgenimizde sol kezdegi mınıstr Shámshá Berkimbaeva Joǵary bilim berý departamenti basshylyǵyna usynǵanyn búginde maqtanyshpen aıtamyz. Bul jerde aıtaıyn degenimiz: joǵary oqý oryndaryndaǵy bilimi men biligi saı, myqty menedjerlerdi mınıstrlikke tartý osy kúnge deıin jalǵasyp kele jatyr.
Igi bastamalar mınıstr Baqytjan Jumaǵulov tusynda da sátti júzege asty. Ýnıversıtetterge bilikti rektorlar men prorektorlar taǵaıyndalyp, jaýapty oryndardyń mártebesi bıikteı tústi. Osy oraıda 2010 jyly joǵary mekteptiń tájirıbeli menedjeri Zulfýhar Sultanuly mınıstrlikke shaqyrylyp, Bilim jáne ǵylym salasyndaǵy baqylaý komıteti tóraǵasynyń orynbasary qyzmetine taǵaıyndaldy.
Joǵary jáne joǵary oqý ornynan keıingi bilim salasynda biryńǵaı memlekettik saıasatty qalyptastyrýǵa qatysyp, joǵary sapany qamtamasyz etý baǵytynda Zulfýhar Ǵaıypovtyń qarym-qabileti, iskerligi, biliktiligi, mádenıeti tarazyǵa tartylǵan kez osy shaq edi. Onyń ústine elimizdegi sapasyz ýnıversıtetterdiń sanyn qysqartý mindeti de oǵan júktelgenin jaqsy bilemiz. El basshylyǵynyń baqylaýynda turǵan osy tapsyrmany ol abyroımen oryndap, bedel bıiginen kóringeni de shyndyq.
Budan keıin Zulfýhar Sultanuly on jyl boıy Astanadaǵy ǵasyrlyq tarıhy bar Kólik jáne kommýnıkasııa kolledjiniń dırektory bolyp, osy oqý ornyn elordadaǵy sapaly bilim oshaǵyna aınaldyra aldy.
Búginde ol – Qazaqstan Respýblıkasy Prezıdenti janyndaǵy Memlekettik basqarý akademııasynyń ınstıtýt dırektory. Memlekettik qyzmetshilerdiń kásibı damýy men bilim alýyna atsalysyp, memlekettik apparat mamandary men kásibı basqarýshylardy daıarlaý isinde jigerli jetekshi, bilikti basshy, utqyr uıymdastyrýshy, myqty menedjer retinde tanyldy.
Biz birneshe jyldan beri Zulfýhar Sultanulynyń qaıratkerlik tulǵasyn odan saıyn jaqynnan tanyp, tánti bolyp júrmiz. Prezıdent janyndaǵy Ulttyq quryltaı múshesi, Astana qalasy Qoǵamdyq keńesiniń tóraǵasy syndy memleketshildik qyzmetinde ol árqashan bastamashyl toptyń ishinde, qaınaǵan ıdeıalardyń ortasynda júredi. Bilimniń mańyzy, mádenıettiń jaýapkershiligi, jastardyń múddesi, shahar jurtshylyǵynyń san túrli ózekti máseleleri – Zulfýhar Ǵaıypov pen pikirlesteriniń nysanasy.
Ashyq azamattyq qoǵam men ádiletti memleket qurý men demokratııalyq úderisterdi ornymen júrgizýde Ulttyq quryltaıdyń orny erekshe ekeni belgili. Saıasattaný ǵylymdarynyń doktory, professor, qoǵam qaıratkeri Zulfýhar Sultanuly salanyń kókeıkesti problemalaryn, elorda halqynyń arman-tilegin jaýapty oryndarǵa Quryltaı minberinen oraıly jetkizip te júr.
Elimizdegi qoǵamdyq keńester halyq pen memlekettik organdar arasyndaǵy qarym-qatynasty jeńildetý jáne ashyq dıalog alańyn qurýǵa aıanbaı kómektesip júrse, osy jumystyń jýan ortasyndaǵy elorda Qoǵamdyq keńesi, onyń tóraǵasy Zulfýhar Ǵaıypovtyń orny – óz aldyna bólek áńgime. Eń bastysy, ortaq iste nátıje bar.
Qoǵam minberi – el úmit artqan keńester, al onyń qýaty – alqalaǵan halyq pen jaýapty zııaly. Ekeýi úılesse, halyq utady. Ádilettik te osy baǵdarda óristeıdi.
Keńestik Qazaqstannyń alǵashqy Syrtqy ister mınıstri Tólegen Tájibaevtyń saıası qaıratkerlik qyrlaryn indete zerttep, dıssertasııa qorǵaǵan ǵalymnyń ózi de búginde kásibı tolysqan, rýhanı kemeldengen kezeńge kóterildi. Áriptesimizdiń kásiptik-tehnıkalyq bilim baǵytyndaǵy oı-tolǵamy men usynystary sapalanýǵa bet alǵan sala úshin mańyzdy dep sanaımyz.
Jańa turpatty ádiletti Qazaqstan memleketshil, jaýapty azamattaryn maqtanysh etedi. Zııalylyq dástúr sabaqtastyǵynyń máni de osynda.
Kárimbek QURMANÁLIEV,
Ulttyq quryltaı múshesi, akademık