Shymkent qalalyq polısııa departamentiniń qyzmetkerleri kıberqylmysqa qarsy kúres bastady. Sonyń aıasynda Shymkent, Almaty qalasy men Almaty oblysynda ınternet-alaıaqtyqpen aınalysqan toptyń qylmystyq áreketi áshkerelendi. Tekserý barysynda kúdiktilerdiń ınternet-alaıaqtyqtyń 9 jaıtyna qatysy bar ekeni anyqtaldy. Keltirilgen materıaldyq shyǵyn jalpy somasy 141 mıllıon teńgeden asyp otyr, dep habarlaıdy Egemen.kz.
Arnaıy operasııa kezinde qylmystyq toptyń 4 múshesi qolǵa tústi. Olar osy qylmysty uıymdastyryp júrgen top basshysy, dropperlerdi tartýmen aınalysqan eki kúdikti sondaı-aq qolma-qol aqsha alyp, uıymdastyrýshyǵa jetkizip otyrǵan tasymaldaýshy. Osy iske qatysty qazirgi tańda tergeý amaldary júrgizilip, kúdiktilerdiń osyǵan uqsas ózge de qylmystarǵa qatystylyǵy anyqtalý ústinde.
Aıta ketý kerek qylmyskerlerdi ustaý is-sharasy qalalyq prokýratýranyń úılestirýimen qolǵa alyndy. Polısııa departamenti mamandarynyń aıtýynsha 16 qyrkúıekten bastap elimizde bank shotyna, tólem nemese sáıkestendirý quraldaryna zańsyz qol jetkizý, ony berý nemese alý, sondaı-aq zańsyz tólemder men aqsha aýdarymdaryn jasaǵan azamattarǵa qylmystyq jaýapkershilik qarastyrylǵan.