30 qyrkúıek elimizde ádilet organdary qyzmetkerleriniń kásibı merekesi atalyp ótiledi. Elimizdegi norma shyǵarý úderisiniń úılestirýshisi, zań ústemdiginiń oryndalýy men quqyqtyq negizin qalyptastyrýshy mamandardyń azamattardyń quqyqtyq saýatyn arttyrýda da alar orny erek, dep jazady Egemen.kz.
Ádilet organdarynyń mindeti tek sot sheshimderiniń oryndalýyn qamtamasyz etýmen shektelmeıdi. Tártipti tý etken qyzmetkerlerdiń eseli eńbegin Astana qalasynyń Ádilet departamentiniń basshysy Talǵat Ábýbákir tarqata aıtyp berdi.
«Ádilet organdary zań salasyndaǵy kásibı qaýymdastyqtardyń – advokattar alqasy, notarıat, jeke sot oryndaýshylar jáne zań konsýltanttary palatasynyń jumysyn úılestiredi. Sonymen qatar, kommersııalyq emes uıymdardy tirkeý jáne qaıta tirkeý baǵytynda da jumys atqarady. Iаǵnı, ádilet organdary – qoǵamda quqyqtyq tártip pen zań ústemdigin qamtamasyz etetin negizgi memlekettik ınstıtýttardyń biri», dedi ol.
Salada 18 jyldan astam ýaqyt qyzmet etip kele jatqan Talǵat Meıirimhanuly zańnyń ádil oryndalýy men qoǵamda quqyqtyq mádenıetti qalyptastyrýǵa baǵyttalǵan jumystar úzdiksiz júrgiziletinin atap ótti.
«Biz turaqty túrde «Ashyq esik kúnderin», semınarlar, dóńgelek ústelder jáne oqý oryndarymen kezdesýler ótkizemiz. Áleýmettik jelilerde beınerolıkter men jadynamalar jarııalanyp, túsindirý jumystary belsendi júrgizilip jatyr. Sonymen qatar, Astana qalasynyń joǵary oqý oryndarymen birlesip Zań klınıkalary ashyldy. Bul klınıkalarda stýdentter tájirıbe jınaqtap qana qoımaı, halyqqa tegin quqyqtyq keńes beredi», dep túsindirdi Astana qalasynyń Ádilet departamentiniń basshysy.
Salaǵa jańa tehnologııalardy engizý aıasynda QR normatıvtik quqyqtyq aktileriniń aqparattyq-quqyqtyq júıesi – «Ádilet» portalynda vırtýaldy konsýltant-chat-bot iske qosylǵan. Ol azamattardyń suraqtaryna onlaın túrde quqyqtyq jaýap beredi. Sondaı-aq Ádilet organdary azamattarǵa memleket kepildik bergen zań kómegin usynady. Bul sanatta quqyqtyq keńes berý, aryzdar men ótinishterdi rásimdeýge kómektesý, quqyqtyq túsindirý jumystaryn júrgizý qyzmetteri bar. Al qajettilik týǵan jaǵdaıda advokat ta bekitýge yqpal etip, azamattyń quqyǵy sotta qorǵalady.
Azamattar ádilet organdaryna myna máselelermen júgine alady:
* alıment, eńbekaqy jáne ózge de qaryzdardy óndirý;
* turǵyn úı jáne múliktik daýlar;
* kommersııalyq emes uıymdardy tirkeý jáne qaıta tirkeý;
* notarıýstardyń, advokattardyń, zań konsýltanttarynyń qyzmetine qatysty shaǵymdar men suraqtar.