Elimizde ǵylym jolyna bet burǵan jastardyń qatary artyp keledi. Bıyl magıstratýra men doktorantýraǵa túsýge nıettiler sany kóbeıip, memlekettik granttar kólemi de artqan.
Ǵylym jáne joǵary bilim mınıstrliginiń dereginshe, bıyl magıstratýraǵa túsý úshin keshendi testileýge 51 myńnan astam ótinish túsken. Bul ótken jylmen salystyrǵanda 9,5 myńǵa artyq. Synaqqa qatysqan 47 798 úmitkerdiń jartysyna jýyǵy, ıaǵnı 23 065 talapker shekti upaı jınaǵan. Ortasha kórsetkish te joǵarylap, KT-nyń ortasha baly 72,9-ǵa jetken.
Magıstratýraǵa 13 554 memlekettik grant bólingen. Onyń ishinde ınjenerlik-tehnıkalyq baǵyttarǵa – 3 338, pedagogıkalyq ǵylymdarǵa – 3 225, aqparattyq-kommýnıkasııalyq tehnologııalarǵa – 1 315, jaratylystaný ǵylymdaryna 1 268 grant qarastyrylǵan.
Bıyl doktorantýraǵa qyzyǵýshylyq ta aıtarlyqtaı ósken. Qabyldaý synaqtaryna 4 307 adam qatysyp, olardyń 3 146-sy bilim alýǵa múmkindik alǵan. 2025–2026 oqý jylyna 2 919 memlekettik grant bólindi. Onyń ishinde pedagogıkalyq ǵylymdarǵa – 486, ınjenerlik jáne qurylys salalaryna – 615, aqparattyq-kommýnıkasııalyq tehnologııalarǵa 161 grant bólingen.
Ǵylym jáne joǵary bilim mınıstrliginiń málimetinshe, qazir doktorantýraǵa qabyldaý rásimi tolyqtaı joǵary oqý oryndarynyń quzyretinde. Bul ýnıversıtetterdiń akademııalyq derbestigin arttyryp, ǵylymı kadrlar daıarlaýdyń sapasyn jaqsartýǵa múmkindik beredi.