Batys Qazaqstan oblysynda qytaı kásipkerleriniń qatysýymen 14 ınvestısııalyq joba qolǵa alyndy dep habarlaıdy Egemen.kz.
Batys Qazaqstan oblysy ákimdiginiń baspasóz qyzmeti habarlaǵanyndaı, óńir basshysy osy kúnderi Qytaı Halyq respýblıkasynda qyzmet babymen júr. О́ńirde Memleket basshysynyń tapsyrmasyna sáıkes, qytaı kásipkerleriniń qatysýymen 14 ınvestısııalyq joba qolǵa alynǵan. Kórshi eldiń ınvestorlary energetıka, aýyl sharýashylyǵy, densaýlyq saqtaý sııaqty birqatar mańyzdy salalarǵa jalpy quny 134 mıllıard teńgeden astam qarjy salýǵa nıetti. Bul baǵytta eki jaqty naqty kelisim bar. Endi sanaýly kúnderden keıin eki zaýyttyń qurylysy bastalady. Oǵan qajetti qural-jabdyq tıelgen konteınerlerdiń alǵashqy legi Qytaıdyń Veıfan qalasynan Aqjaıyqqa jóneltildi.
Zaýytqa qajetti qondyrǵylardyń alǵashqy partııasyn tıeý rásimine Batys Qazaqstan oblysynyń ákimi Narıman Tóreǵalıev bastaǵan delegasııa arnaıy qatysty.
«Prezıdent Qasym-Jomart Toqaev QHR Tóraǵasy Sı Szınpınmen kezdeskende «Qytaı – Qazaqstannyń eń iri saýda seriktesi. Ortaq iri jobalarymyz júzege asyrylyp jatyr»,- dep aıtqan bolatyn. Memleket basshysy atap ótkendeı, biz shıkizatqa táýeldi bolmaı, óńdeý ónerkásibin, aýyl sharýashylyǵyn, óndiristi damytýǵa erekshe mán berip otyrmyz. Bul jobalar óńir ekonomıkasynyń damýyna eleýli serpin beredi», dedi Batys Qazaqstan oblysynyń ákimi Narıman Tóreǵalıev.
Jospar boıynsha, arnaıy ındýstrıaldy aımaqta aldymen qýaty 34 megavatt bolatyn gaz elektr stansııasy salynady. Bul joba keıingi óndiris oryndaryn turaqty energııamen qamtamasyz etýge baǵyttalǵan. Sonymen qatar munaı katalızatorlaryn qaıta óńdeý zaýytynyń qurylysy bastalmaq.
Oblysta josparlanǵan 14 jobanyń bárin bir konsorsıým atqarady. Quramyndaǵy birneshe kompanııa tek energetıka salasyn ǵana emes, agrotehnıka, munaı, qurylys, densaýlyq saqtaý salalaryn da ınvestısııalaıdy. Batysqazaqstandyq jumysshy top Shandýn provınsııasyndaǵy keshendi aralap, tyń tehnologııamen tanysty.
Qytaılyq «VEGA Power» kompanııasynyń bas dırektory Ge Szıan Aqjaıyqtaǵy joba kezeń-kezeńimen júzege asyrylatynyn, alǵashqy kezeńde 30 mıllıon AQSh dollary kóleminde ınvestısııa salynatynyn atap ótti. Joba tolyq júzege asqanda 10-nan astam ónim túri shyǵarylady.
Oblys ákiminiń aıtýynsha, ınvestorlar óńirde tirkelip, salyq túsimi jergilikti bıýdjetke baǵyttalýy tıis; jergilikti kadrlar jumysqa ornalastyrylady; bolashaq mamandardy oqytý ınvestorlardyń qarajaty esebinen júrgiziledi.
Budan bólek, Batys Qazaqstan oblysy medısına salasy boıynsha da Qytaımen baılanysty nyǵaıtady. Oraldyq delegasııa iKang Guobin Checkup Center emhanasyna baryp, Qytaıdyń densaýlyq saqtaý júıesindegi zamanaýı ádistermen jáne medısınalyq qyzmet kórsetýdiń ınnovasııalyq úlgilerimen tanysty.
Aıta ketý kerek, bıyl alǵashqy jartyjyldyqtyń qorytyndysy boıynsha Batys Qazaqstan oblysy tikeleı sheteldik ınvestısııalar kólemi boıynsha respýblıkada 3-orynda tur.
Aıta keteıik, bul kezdesýler elimizdiń Qytaı Halyq Respýblıkasyndaǵy Elshiliginiń qoldaýymen uıymdastyrylǵan.