11 qazanda Úndistannyń Bhýbaneshvar qalasynda ústel tennısinen Azııa chempıonatynyń shymyldyǵy túriledi. Bul jarysta elimizdiń týy astynda 10 oıynshy óner kórsetedi.
Bul birinshiliktiń tusaýy 1952 jyl kesildi. Sodan beri 27 jarystyń jalaýy jelbiredi. Deni Qytaı quramasynyń jarqyn jeńismen aıaqtaldy. Olar 327,5 (135 altyn+84 kúmis+108,5 qola) ret jeńis tuǵyryna kóterildi. Ekinshi, úshinshi oryndarda Japonııa (18+24+71,5) men Ońtústik Koreıa (14+28+53). Odan keıingi satylarǵa Soltústik Koreıa (7+19+27), Gonkong (5+11+37,5), Úndistan (2,5+4+10), Taıpeı (2+9+23), Sıngapýr (1+7+9), Malaızııa (0+0+1), Vetnam (0+0+1) jaıǵasty.
Sońǵy Azııa chempıonaty bir jyl buryn Almatyda uıymdastyryldy. Jarystyń erler men áıelderdiń jekelegen saıysynda Tomakadzý Harımoto (Japonııa) men Kým Kım En (Soltústik Koreıa) ozdy. Fınalda olar Lın Shıdýn (Qytaı) men Mıva Harımotony (Japonııa) utty. Juptyq jarysta Lım Chon Hýn/An Dje Hen (Ońtústik Koreıa) men Sasýkı Odo/Sakýra Ekoıdyń (Japonııa) ekpinine eshkim shydamady. Aralas juptardyń tartysynda Lı Shı Dong pen Kýaı Menniń (Qytaı) mereıi ústem boldy. Komandalyq básekede Qytaıdyń oıynshylary ozdy. Fınalda olar Taıpeıdi tize búktirdi.
Elimizdiń sportshylary sary qurlyqtyń basty dodasynda júlde alyp kórgen emes. Sol olqylyqtyń ornyn toltyrý maqsatynda Úndi elindegi jarysqa Kırıll Gerasımenko, Alan Qurmanǵalıev, Aıdos Kenjeǵulov, Eskendir Harkı, Sanjar Jubanov, Záýresh Aqasheva, Sarvınoz Mirqadyrova, Ánel Baqyt, Janerke Kóshkimbaeva, Albına Jaqsylyqova syndy oıynshylarymyz attandy.