Qazirgi tańda elimizde saıası jańǵyrýdyń jańa kezeńi júrip jatyr. Ádiletti Qazaqstan qurý jolyndaǵy strategııalyq baǵdar aıqyndaldy. Jańa saıası jáne quqyqtyq ınstıtýttar da qalyptasyp jatyr. Qoǵamnyń azamattyq belsendiligi men saıası mádenıeti artyp keledi. Mundaı jaǵdaıda memlekettik basqarý júıesin jańartý jáne onyń tıimdiligin arttyrý – ýaqyt talaby.
Osy turǵydan alǵanda, bir palataly Parlamentke kóshý elimizdiń saıası júıesin jańǵyrtýdyń mańyzdy jáne ózekti baǵyty dep esepteımiz. Bul bastama zań shyǵarý úderisin jeńildetip, sheshim qabyldaýdy jedeldetýge, demokratııalyq baqylaýdy kúsheıtýge múmkindik beredi. Parlament – halyqtyń ókildik organy. Onyń basty mindeti – azamattardyń múddesin qorǵaý. Bir palataly qurylym halyq pen bılik arasyndaǵy baılanysty nyǵaıtyp, ózara is-qımyldy ońtaılandyrýǵa tolyq múmkindik beredi.
Halyqaralyq tájirıbege júginsek, mundaı sheshim kóptegen elde oń nátıjesin kórsetti. Mysaly, Danııa, Shvesııa, Kosta-Rıka, Perý, Ońtústik Afrıka sııaqty memleketter eki palataly júıeden bir palataly Parlamentke ótti. Olar mundaı qadamǵa memlekettik basqarý tıimdiligin arttyrý, shyǵyndardy azaıtý jáne zań shyǵarý úderisiniń ashyqtyǵyn qamtamasyz etý maqsatynda bardy. Atalǵan mysaldar kórsetkendeı, Parlament qurylymyn ońtaılandyrý – bılik tarmaqtarynyń tıimdi ózara is-qımylyn qamtamasyz etýdiń, demokratııalyq ınstıtýttardy nyǵaıtýdyń jáne halyqtyń ókildik etý tetikterin jetildirýdiń mańyzdy sharty.
Biz bul reformany Ádiletti Qazaqstan qurý jolyndaǵy saıası jańǵyrýdyń qısyndy ári qajetti jalǵasy dep sanaımyz. Prezıdent Qasym-Jomart Toqaevtyń tapsyrmasyna sáıkes qurylǵan Parlamenttik reforma jónindegi jumys toby alǵa qoıylǵan mindetterdi sapaly jáne júıeli túrde júzege asyrýǵa tolyq daıyn. Bul top parlamenttik reformany ázirleý men iske asyrý baǵytynda tıimdi pikirtalas jáne kásibı talqylaý alańyna aınalyp, elimizdiń saıası júıesin jetildirýge baǵyttalǵan naqty usynystar engizedi dep senemiz.
Únzıla ShAPAQ,
Májilis depýtaty