Almatyda ótken jıynda QR Parlamenti Senatynyń depýtaty Bıbigúl Jeksenbaı etnosaralyq kelisimdi nyǵaıtýda buqaralyq aqparat quraldarynyń rólin atap ótip, jýrnalıstik etıkanyń qoǵamdaǵy tatýlyq pen ulttyq qaýipsizdik úshin mańyzyn aıtty. Is-shara barysynda Bas redaktorlar klýby men QHA jýrnalıster klýby arasynda ózara áriptestik týraly Memorandýmǵa qol qoıyldy, dep habarlaıdy Egemen.kz.
Bıbigúl Jeksenbaıdyń aıtýynsha, kópetnosty Qazaqstan úshin BAQ-tyń róli aıryqsha. Árbir sóz ben jarııalanym qoǵamdaǵy senim men tatýlyqqa áser etedi.
«Sondyqtan jýrnalıstiń kásibı etıkasy — bul tek mamandyq talaby emes, ulttyq qaýipsizdik pen qoǵamdyq kelisimniń kepili. Kóptegen elderde etnosaralyq taqyryptardy jarııalaýda naqty etıkalyq normalar bar. Mysaly, Ulybrıtanııada Ofcom óshpendilik tiline jol bermeıdi. Kanadada jýrnalıst osy baǵyttaǵy «názik» taqyryptardy etnostyq toptarmen keńesip baryp jazady. Eýropa Keńesiniń hartııasynda: «Jýrnalıst qoǵamdy bólýge emes, túsinistikke qyzmet etýi tıis», delingen. Bul — jaýapty jýrnalıstıkanyń ortaq qaǵıdaty», dedi depýtat.
Onyń sózinshe, elimizde 130-dan astam etnos ómir súredi, sondyqtan sóz mádenıeti – kelisim mádenıetimen tyǵyz baılanysty.
Jıynda Bas redaktorlar klýby men Qazaqstan halqy Assambleıasy jýrnalıster klýby BAQ-ta etnosaralyq jáne dinı máselelerdi jarııalaý jóninde Etıkalyq kodeks qabyldaý, arnaıy medıa keńesin qurý jáne «Toleranttylyq jáne medıaetıka» pánin jýrnalıstıka mamandyqtaryna engizý máselelerin talqylady.
«Bul sharalar sóz bostandyǵyn shekteý emes — senim men kásibılikti arttyrý tetigi. Halqymyz «Birlik bar jerde – tirlik bar» deıdi. Aqparattyq dáýirde bul qaǵıda burynǵydan da ózekti. Bizdiń mindetimiz — sóz arqyly kelisimdi, túsinistikti jáne ózara qurmetti nyǵaıtý», dedi Bıbigúl Jeksenbaı.