Telearna ekzıt-poll ótkizbekshi

KTK telearnasy 2015 jyldyń 26 sáýirinde ótetin Prezıdent saılaýynda exit-poll júrgizýdi qarjy­lan­dyratyn bolady. Osyǵan oraı, keshe atalmysh telearnanyń keńsesinde baspasóz máslıhaty ótti. Telearnanyń saılaý ýchas­­keleriniń shyǵaberisinde saılaý­­shylar arasynda saýal­na­ma júr­gizýge tapsyrys berýi – bul Qa­zaqstan jaǵ­daıynda al­ǵash­qy tájirıbe. Tap­syrys­ty «Stra­tegııa» áleý­met­tik jáne saıası zertteýler orta­lyǵy oryndaıdy. Ekzıt-poll saılaý úde­risiniń mańyzdy quramda­s­tary­nyń biri bolyp tabylady. Onyń nátıjeleri saılaý­dyń ashyqtyǵy men saılaý­shylardyń daýysyn sanaýdyń ádilettigin baǵalaýdyń quraly retinde paıdalanylady. Sonymen qatar, ekzıt-poll saılaý kúni azamattardyń daýys berýi boıynsha jedel aqparat alýǵa múmkindik beredi, sonyń negizinde saılaýdyń nátıjesin boljaýǵa múmkindik bar. KTK telearnasy Qazaq­stan­da ekzıt-poll ótkizý táji­rıbesiniń damýyna óz úlesin qosýdy mańyzdy dep sanaıdy. Bul is-shara saılaý prosesine degen qoǵamdyq qyzyǵýshylyqty arttyrýǵa septigin tıgizedi, sonymen qatar qazaqstandyq saı­laýshylardyń belsendi azamattyq ustanymdarynyń qalyptasýyna yqpal etedi. Saılaý kúni KTK ekzıt-poll ótkiziletin oryndar­dan tikeleı kórsetilimder júr­gi­zýdi jáne daýys berý úrdisi boı­ynsha kórermenderdi aqparat­tandyrýdy josparlap otyr. Saýalnamany 2001 jyldan beri jumys istep kele jatqan elimizdegi tanymal zertteý uıymdarynyń biri «Strategııa» ortalyǵy júzege asyrady. Bul ortalyqtyń zertteý júrgizý salasynda tájirıbesi mol. Saılaý kúni ortalyq búkil el boıynsha 20 myńnan asa saılaý­shylar arasynda saýalnama júrgizýdi josparlap otyr. «Strategııa» suhbat alýshylary aýyldyq jáne qalalyq eldi mekenderdegi 200 saılaý ýchas­ke­leriniń shyǵaberisinde turady. Aınash ESALI, «Egemen Qazaqstan». ALMATY.