Taıaýda Kókshetaýdyń seksennen astam turǵyny baspanaly boldy. Jaıly páterler renovasııa baǵdarlamasy aıasynda jáne áleýmettik jaǵynan az qamtylǵan otbasylarǵa berildi, dep jazady Egemen.kz.
Páter kiltterin oblys ákimi Marat Ahmetjanov tabys etti. Ákim óz sózinde el Prezıdentiniń halyqtyń ál-aýqatyn arttyrý men ómir súrý sapasyn jaqsartýǵa erekshe kóńil bólip otyrǵanyn atap aıtty. Búgingi shara osyndaı mańyzdy baǵyttardyń biri. Aıta keterligi, sońǵy eki jyl ishinde bes myńǵa jýyq muqtaj otbasy baspanamen qamtylǵan. Bul buǵan deıingi jeti jylda atqarylǵan jumysqa teń. Osyndaı ilkimdi sharalar turǵyn úı kezegin qysqartýǵa múmkindik berip otyr.
«Kúni búginge deıin sonaý 1964 jyly salynǵan apatty úıde turyp keldik. Tipti, jóndeýge kelmeıtin jaǵdaıda edi. Búgin armanymyz oryndaldy», deıdi baspanaly bolǵannyń biri Taslıma Toqbergenova.
Bıyl oblys boıynsha túrli sanattaǵy azamattarǵa, sonyń ishinde áleýmettik jaǵynan az qamtylǵan adamdarǵa 700-ge jýyq páter berilgen. Jyl sońyna deıin barlyǵy 1200 páter tapsyrý josparlanyp otyr.
Kókshetaý