Astanada «Qazaqstan – akademııalyq bilim berý aýmaǵy» strategııalyq seriktesterdiń halyqaralyq forýmy bastaldy. Forýmǵa joǵary oqý oryndarynyń rektorlary, akkredıtteý organdarynyń ókilderi men sheteldik ýnıversıtet fılıaldarynyń jetekshileri qatysty, dep jazady Egemen.kz.
AI-Sana Ceremony bilim berý júıesine jasandy ıntellekt tehnologııalaryn engizý jáne sıfrlyq quzyretterdi damytýdy kózdeıdi. Qatysýshylardy Prezıdentiniń kómekshisi Qýanyshbek Esekeev quttyqtap, AI-Sana bastamasynyń jańa býynnyń zııatkerlik ekojúıesin qalyptastyrýdaǵy mańyzdylyǵyn atap ótti.
«О́tken jyly jeltoqsan aıynda Prezıdent Qasym-Jomart Kemeluly AI-Sana baǵdarlamasyn ázirleýdi tapsyrǵan bolatyn. Arada az ǵana ýaqyt ótip, búgin bazalyq kýrs nátıjeleri boıynsha baǵdarlamanyń alǵashqy nátıjesin kórip otyrmyz. Úkimettiń, mınıstrliktiń, ýnıversıtetterdiń, stýdentterdiń jáne baǵdarlama seriktesteriniń birlesken kúsh-jigeriniń arqasynda biz joǵary oqý oryndarynda jasandy ıntellektini damytý ekojúıesiniń negizin qalap, jastardyń áleýetin ashýǵa jaǵdaı jasadyq. Osy jyldyń ishinde stýdentterimiz úlken joldan ótti. Olardyń jobalary sıfrlyq forýmdar men kórmelerden bastap Parlament otyrystaryna, sondaı-aq Prezıdentpen kezdesýlerge deıin túrli alańdarda tanystyryldy. Búgin biz alǵash ret úzdikterdi – AI-Sana Leaders baǵdarlamasynyń jeńimpazdaryn resmı túrde marapattaý úshin jınaldyq. Olardyń jobalary medısına men bilim berýden bastap ónerkásip pen qaýipsizdikke deıingi túrli salalardy qamtıdy. Stýdenttik sheshimder búginde ekonomıkanyń jáne áleýmettik salanyń ártúrli baǵyttarynda qoldanylyp jatyr. Bul – alǵashqy qadamdar, alda – jańa belester, jańa ıdeıalar jáne jańa jeńister», dedi Qýanyshbek Baqytbekuly.
AI-Sana Ceremony sharasy aıasynda elimizdiń joǵary oqý oryndary arasynda úzdik jasandy ıntellekt jobalarynyń avtorlary marapattaldy.
«AI – Sana Leader», «Bilim berýdegi úzdik JI jobasy – Akademııalyq adaldyq», «Saladaǵy úzdik sheshim», «Energetıka salasyndaǵy úzdik JI jobasy», «Densaýlyq saqtaý salasyndaǵy úzdik JI jobasy», «Mansaptyq traektorııalardy qurýǵa arnalǵan JI», «Mádenıet salasyndaǵy úzdik JI jobasy», «О́nerkásiptegi úzdik JI jobasy», «Qoǵam ıgiligi úshin: jyldyń áleýmettik bastamasy», «Bıomedısına salasyndaǵy úzdik JI jobasy», «Inklıýzıvti JI tehnologııalary» jáne basqa da atalymdar boıynsha jeńimpazdar anyqtaldy. Shara aıasynda qatysýshylar jasandy ıntellekt salasyndaǵy jobalar tanystyrylǵan JI sheshimder kórmesin tamashalady.
Forým qatysýshylaryna Stenford ýnıversıtetiniń professory, Dúnıejúzilik bank janyndaǵy halyqaralyq saraptamalyq keńestiń tóraǵasy Pol Kım beınequttyqtaý joldady. Ol Qazaqstannyń sıfrlandyrý salasyndaǵy aıtarlyqtaı jetistikterin atap ótip, Ǵylym jáne joǵary bilim mınıstrligimen yntymaqtastyqty nyǵaıtýǵa daıyn ekenin jetkizdi. Onyń aıtýynsha, aldaǵy alty jylda AI-Sana jobasy jasandy ıntellekt pen kásipkerlik daǵdylary boıynsha júzdegen myń stýdentti oqytýǵa múmkindik beredi.
Ǵylym jáne joǵary bilim mınıstri Saıasat Nurbek atap ótkendeı, AI-Sana bastamasy tek zamanaýı tehnologııalardy ıgerýge ǵana emes, ýnıversıtetterde jańa oılaý mádenıetin qalyptastyrýǵa baǵyttalǵan.
«Búginde 549 myń stýdent jasandy ıntellekt pen JI basqarý kýrstarynan ótti, al baǵdarlama sońyna deıin 650 myń bilim alýshyny qamtý josparlanyp otyr. Jyl basynda iske qosylǵan daıyndyq kezeńinde 390 myń sertıfıkat berilgen. AI-Sana – bul jaı ǵana bilim berý baǵdarlamasy emes, startaptar qurýǵa, jasandy ıntellektini kásibı qyzmetke engizýge jáne salalardyń tehnologııalyq damýyn jedeldetýge qabiletti jańa býyndy qalyptastyratyn qozǵalys», dedi mınıstr.
Huawei kompanııasy jasandy ıntellektke arnalǵan kýrstardy jergiliktendirip, olardy 175 myń stýdent aıaqtap, 250 myńnan astam sertıfıkat ıelendi. Coursera bilim berý platformasy 95 qazaqstandyq joǵary oqý ornyna arnalǵan 37 myń lısenzııa usyndy. Nátıjesinde stýdentter 59 myń sertıfıkat alyp, Qazaqstan Coursera Awards halyqaralyq syılyǵynyń fınalısteri qataryna endi.
Sonymen qatar shara barysynda «Ǵylym qory» AQ men «Platonus» JShS arasynda AI-Sana Academy platformasyn iske asyrý jónindegi yntymaqtastyq týraly memorandýmǵa qol qoıyldy.