«Keleshek mektepteri» – oqýshyǵa qoljetimdi sapaly bilim berýdi kózdeıtin bilim ordalary. Mundaǵy ózindik oqý-tárbıe úderisi bar balanyń jan-jaqty damýyna jaǵdaı jasaǵan. Ulttyq joba aıasynda 460 myń orynǵa shaqtalǵan 217 mektep ashylady dep josparlanǵan. Qazir jospardyń 69 paıyzy oryndaldy. Bul degenimiz – 151 bilim mekemesi.
Eske sala keteıik, jańa 2025–2026 oqý jylynda 83 oqý ordasy jańadan ashyldy, onyń 57-si «Keleshek mektepteri» ulttyq jobasy aıasynda salyndy. Osy oqý ordalarynyń barlyǵynda negizgi maqsatty júzege asyratyn myqty mamandar jumys isteýi qajet. Sondyqtan «Keleshek mektepteriniń» mamandaryna da erekshe mán berilip otyr.
Oqý-aǵartý mınıstrliginiń «О́rleý» biliktilikti arttyrý ulttyq ortalyǵy «Keleshek mektepteri» jobasy aıasynda muǵalimderdiń kásibı quzyrettiligin arttyrý boıynsha júıeli jumys júrgizdi. Búginde «Keleshek mektepteriniń» 7 myńnan astam muǵalimi LMS platformasy arqyly biliktilikti arttyrý kýrstarynan ótip jatyr. Onda bazalyq deńgeıdegi 11 pán qamtylǵan: bastaýysh synyp, qazaq, orys jáne aǵylshyn tilderi, matematıka, ınformatıka, fızıka, hımııa, bıologııa, geografııa jáne tarıh.
Baǵdarlama pándik bilimdi negizgi jumysynan qol úzbeı jańartý, kásibı quzyrettilikti arttyrý jáne muǵalimderge ádistemelik qoldaý kórsetýge baǵyttalǵan. Sonyń ishinde pándik bilimdi tereńdetý, oqytý sapasyn arttyrý, oqýshylarmen tıimdi qarym-qatynas ornatýǵa nazar aýdaryldy. Aldaǵy ýaqytta da pedagogter basym baǵyttar boıynsha oqytýmen qamtylady.
«Keleshek mektepterin» basqarý tıimdilik qaǵıdaty boıynsha uıymdastyrylady. Dırektorlardy taǵaıyndaý kezinde basymdyq «Bilim salasyndaǵy 1000 ózgeris kóshbasshysy» jobasyna qatysqan úmitkerlerge beriledi. Bul joba Prezıdenttik jastar kadr rezerviniń úlgisinde jasalǵan. Onda bolashaq basshylardy qyzmetke taǵaıyndalmaı turyp daıarlaýdy mindetteıtin halyqaralyq tájirıbe negizge alynǵan. Úmitkerler bes kezeńnen turatyn irikteýden ótip, keshendi túrde oqytylady. Buǵan qosa, tálimgerlermen jumys istep, taǵylymdamadan ótedi. Mundaı tásil synı oılaıtyn ári ózgeristerge daıyn basqarýshylardy qalyptastyrýǵa jol ashady.
2023–2024 jyly kadrlyq revervke engen 583 pedagogtiń 70 paıyzdan astamy konkýrssyz basshylyq qyzmetke taǵaıyndaldy. Bıyl taǵy 403 dırektor orynbasary rezervke qabyldandy. Sonyń nátıjesinde mektep dırektorlarynyń tapshylyǵy úsh esege qysqardy. Ásirese jańa formattaǵy «Keleshek mektepterine» basa nazar aýdarylyp otyr. Búginde elimiz boıynsha ulttyq joba aıasynda ashylǵan 151 mektep jumys isteıdi. Onyń ishinde 40 mektepti «Bilim berýdegi ózgeristerdiń 1000 kóshbasshysy» jobasynyń jeńimpazdary basqarady. Osylaısha, bul bilim ordalary jańa standarttardy, sıfrlyq tehnologııalardy jáne tárbıelik baǵyttaǵy tájirıbelerdi engizetin alańǵa aınalyp otyr.
Zeınep MAHSUTOVA,
Oqý-aǵartý mınıstrligi Orta bilim berý komıteti tóraǵasynyń orynbasary