Qazaqstannyń Energetıka mınıstri Erlan Aqkenjenov «ADIPEC-2025» halyqaralyq energetıkalyq forýmy aıasynda AQSh-tyń Ishki ister mınıstri Dag Bergýmmen kezdesti. Taraptar amerıkalyq kompanııalarmen 30 jyldan astam ýaqyt boıy júzege asyp kele jatqan birlesken jobalardy damytý joldaryn qarastyrdy, dep habarlaıdy Egemen.kz.
Aqkenjenov atap ótkendeı, AQSh kompanııalary Teńiz, Qarashyǵanaq jáne Qashaǵan sııaqty iri jobalarda negizgi seriktester bolyp tabylady. Sondaı-aq Qazaqstannyń energetıkalyq áleýetine senim bildiretin alǵashqy ınvestorlardyń biri.
«Qazaqstanda iske asyrylyp jatqan jobalar bizdiń amerıkalyq áriptesterimizdiń jahandyq portfelderindegi negizgi aktıvterge aınaldy. Bul jobalardyń aýqymy Qazaqstannyń álemdik energetıkalyq turaqtylyqty qamtamasyz etýdegi strategııalyq mańyzdylyǵyn kórsetedi ári ózara tıimdi yntymaqtastyqtyń aıqyn dáleli bolyp otyr», dedi mınıstr.
Kezdesýde jańa ken oryndaryn ıgerý josparlary men iri birlesken jobalardy iske asyrý joldary talqylandy. Sondaı-aq, Kaspıı qubyr konsorsıýmynyń turaqty jáne senimdi jumysyn qamtamasyz etý máselesi qaraldy.
Dag Bergým Qazaqstandaǵy ınvestısııalyq ahýaldy joǵary baǵalap, iri amerıkalyq munaı-gaz kompanııalarynyń uzaq merzimdi tabysty qyzmeti buǵan dálel ekenin aıtty. Ol energetıka salasyn sıfrlandyrý baǵytynda birlesken jobalardy damytýǵa AQSh tarapynyń múddeli ekenin atap ótti.
Kezdesý eki eldiń energetıkalyq seriktestikti nyǵaıtýǵa, uzaqmerzimdi jáne ózara tıimdi yntymaqtastyq ornatýǵa degen nıetin rastady.