Jambyl atyndaǵy Qazaq memlekettik akademııalyq fılarmonııasynyń Úlken zalynda Qazaqstan men Japonııanyń mádenı baılanysyn tereńdete túsken erekshe kesh ótti.
Konsert bastalmas buryn Japonııanyń Halyqaralyq mádenı almasý komıtetiniń ókilderi fılarmonııa foıesinde kópshilikke ulttyq mádenıetiniń bólshegi sanalatyn shaı saltanatyn kórsetti. Sonymen qatar ulttyq oıyndary «sıogı» ıaǵnı japon shahmatynan sheberlik synybyn ótkizdi. Japondardyń úsh ishekti sıamısen aspabynda oınaǵan ansambl de óner kórsetti.
Mádenıet jáne aqparat mınıstrligi men elimizdegi Japonııa elshiliginiń qoldaýymen uıymdastyrylǵan bul konsertte T.Ábdirashev atyndaǵy Memlekettik akademııalyq sımfonııalyq orkestri óner kórsetti. Orkestrge halyqaralyq jáne respýblıkalyq baıqaýlardyń laýreaty – Qýanysh Ismaılov dırıjerlik etti.
Keshte Japonııadan kelgen Kodaı Mınoda (sıamısen), Maıýko Kasýmýr (skrıpka), Kadzýhıro Mııamýra (goboı), Mısýkýnı Sýdzımoto (trýba) jáne Tasaıtıra Motıdzýkı (sýdzýmı) syndy ónerpaz fılarmonııa sahnasynda japondyq mýzykanyń ereksheligin pash etti.
Konsert barysynda Ǵ.Jubanovanyń skrıpka men orkestrge arnalǵan konsertiniń I bólimi, S.Iýdakovtyń «Poemasy», Wada-nyń «Fusuikyo» týyndysy, A.Arýtıýnıannyń trýba men orkestrge arnalǵan konserti sııaqty belgili shyǵarmalary oryndaldy. Sonymen qatar H.Ogýrıdiń goboı men orkestrge arnalǵan «Balladasy», H.Hoshınanyń goboı, sýdzýmı, orkestrge arnalǵan «Jaryq sáýle astyndaǵy duǵa men oıyndar» shyǵarmasy erekshe yqylasqa bólendi.