Mınsk qalasyndaǵy Belarýs Ulttyq kitaphanasynda TMD, Indonezııa, Malı, Mıanma, Oman, Palestına, Serbııa, AQSh, Togo jáne Túrkııa elderi ókilderiniń qatysýymen Jeńistiń 80 jyldyǵyna arnalǵan «Kitaphana – mádenıet fenomeni» atty HII halyqaralyq kongress ótti.
Is-sharaǵa Mádenıet jáne aqparat mınıstrliginiń Qoljazbalar jáne sırek kitaptar ulttyq ortalyǵynyń dırektory, PhD Jandos Boldyqov qatysyp, «Uly Jeńis qaharmandary. Baýyrjan Momyshuly shyǵarmalaryndaǵy soǵystyń adamdyq qyry» taqyrybynda baıandama jasady.
Kongress aıasynda Qoljazbalar jáne sırek kitaptar ulttyq ortalyǵy men Belarýs Ulttyq kitaphanasy arasynda ózara yntymaqtastyq týraly memorandým jasaldy.
Memorandým aıasynda taraptar mádenı almasýdy keńeıtip, kitaphana isi men oǵan qatysty salalarda yntymaqtastyqty damytýǵa kelisti. Sondaı-aq kitaphana qujattary men aqparattyq resýrstardy bólisý, sıfrlandyrý, bıblıografııa jáne ǵylymı aqparat salalarynda birlesken jobalardy iske asyrý josparlanǵan.