Qazaqstannyń úzdik tennısshisi (álemniń besinshi raketkasy) Elena Rybakına 2025 jylǵy áıelder tennısindegi maýsymnyń basty jarysy – WTA qorytyndy týrnıriniń jeńimpazy atandy. Týrnır Saýd Arabııasynyń Er-Rııad qalasynda ótti, dep habarlaıdy Egemen.kz saıty Sports.kz-ke silteme jasap.
Elena Rybakına bes matchtyń bárinde jeńiske jetip, áıelder tennısi tarıhyndaǵy eń iri júlde qorynyń ıegeri boldy. Júldeniń jalpy somasy 5 mıllıon 235 myń AQSh dollary, bul shamamen 3 mıllıard teńgege teń.
«Iá, bul shynynda da óte úlken soma. Shynymdy aıtsam, ázirge bul týraly kóp oılanǵanym joq. Árıne, bul qýanyshty sát. Komanda jáne otbasymmen birge bul jeńisti jaqsy atap ótemiz dep oılaımyn», dedi Rybakına jeńisten keıingi baspasóz máslıhatynda.
Aıta keteıik, fınalda qazaqstandyq tennısshi álemniń birinshi raketkasy, Belarýs eliniń ókili Arına Sobolenkony tize búktirdi.
Bul jeńis Elena Rybakına úshin karerasyndaǵy eń iri ekinshi ataq boldy. Ol buǵan deıin 2022 jyly Ýımbldon týrnırinde top jarǵan edi.
Sonymen qatar Rybakına Azııa elderiniń ishinen WTA qorytyndy týrnırin jeńgen tuńǵysh tennısshi atandy. Onyń tarıhı jetistigi úshin Qazaqstan Prezıdenti sportshyny quttyqtap, «Barys» ordeniniń III dárejesimen marapattaý týraly jarlyqqa qol qoıdy.