Qyrǵyzstannyń Osh qalasynda Abaı Qunanbaıuly atyndaǵy kóshe, eskertkish jáne mýzeıdiń saltanatty ashylý rásimi ótti.
Aýqymdy is-sharaǵa Qazaqstan Respýblıkasynyń Mádenıet jáne aqparat mınıstri Aıda Balaeva, Qyrǵyzstannyń Mádenıet, aqparat, sport jáne jastar saıasaty mınıstriniń orynbasary Askaraly Madamınov, Osh qalasynyń meri Jenıshbek Toktorbaev, sondaı-aq dıplomatııalyq korpýs pen shyǵarmashylyq zııaly qaýym ókilderi qatysty.
Ashylý saltanatynda Aıda Balaeva qatysýshylarǵa alǵys bildirip, bul bastamanyń erekshe mańyzyna toqtaldy.
«Bıyl tamyz aıynda Bishkek qalasynda uly qalamgerler Muhtar Áýezov pen Shyńǵys Aıtmatovqa arnalǵan kompozısııalyq eskertkish ashyldy. Sol ıgi dástúrdi Osh jerinde Abaıdyń esimimen jalǵastyryp otyrmyz. Sondyqtan búgin ashylyp otyrǵan eskertkish, kóshe jáne mýzeı – tek mádenı nysandar ǵana emes. Bul – eki eldiń baýyrlastyǵyn, rýhanı sabaqtastyǵyn jáne ózara qurmetin kórsetetin máńgilik belgi, urpaqty bilim men parasatqa jeteleıtin ortaq qundylyq ekeni sózsiz», dedi mınıstr.
Aıda Balaeva eki el basshylary ekijaqty qatynastardy damytýǵa aıryqsha úles qosyp júrgen qoǵam qaıratkerleri men saıası tulǵalardyń eńbegin joǵary baǵalaıtynyn atap ótti. Sonymen qatar Memleket basshysynyń arnaıy Jarlyǵymen Osh qalasynyń meri Jenıshbek Toktorbaevqa Qazaqstan Respýblıkasynyń memlekettik nagradasy – II dárejeli «Dostyq» ordeni tabystaldy.
Mınıstrdiń aıtýynsha, keıingi jyldary Qazaqstan men Qyrǵyzstannyń mádenı-gýmanıtarlyq yntymaqtastyǵy jańa serpinmen damyp keledi. Birlesken kórmeler, teatr gastrolderi, ádebı jáne jastar forýmdary, zertteýshiler konferensııalary ótkizilýde. Sondaı-aq mádenıet mekemeleriniń áriptestigi nyǵaıyp, IýNESKO aıasyndaǵy baǵdarlamalar sheńberinde ózara qoldaý kúsheıip otyr.
Budan bólek, jumys sapary barysynda mınıstr IýNESKO-nyń Búkilálemdik mura tizimine engen, Qyrǵyzstandaǵy eń iri mýzeılerdiń biri «Sýlaıman-Too» ulttyq tarıhı-arheologııalyq mýzeı-qoryǵyna bardy.