ASTANA. 20 aqpan. Tarazda kúkirt qyshqyl tıelgen vagondar temir joldan shyǵyp ketýine baılanysty jergilikti aýqymdaǵy tótenshe jaǵdaı jarııalandy. Bul týraly Jambyl oblystyq tótenshe jaǵdaılar departamenti baspasóz qyzmetiniń deregine silteme jasaǵan Kapital.kz habarlady.
«Búgin Taraz qalasynyń Shaıquryq jáne Býryl stansalary aralaǵyndaǵy óndiristik aımaq terrıtorııasyndaǵy temir jol bóliginde kúkirt qyshqyly quıylǵan 7 temirjol júgi sısternasynyń relsten shyǵyp ketip, olardyń 3-i bir jaǵyna qaraı aýdarylyp qalýyna baılanysty qala ákimi jergilikti aýqymdaǵy tótenshe jaǵdaı jarııalady. Osynyń saldarynan sısternalardyń birinen azdaǵan mólsherde kúkirt qyshqylynyń tógilý faktisi oryn aldy», - dedi departamenttiń baspasóz hatshysy Sáýle Muńataeva juma kúni.
Ol sondaı-aq poıyzdyń Reseı Federasııasynan shyǵyp, Jambyl oblysynyń aýmaǵyndaǵy «Qazfosfat» JShS mıneraldy tyńaıytqyshtar zaýytyna kele jatqanyn atap ótti. «Poıyzdyń sostavy 44 vagonnan turǵan, olardyń 15-nde kúkirt qyshqyly bolǵan», -dep habarlaıdy QazTAG.
Qazirgi tańda kúkirt qyshqyly tógilip, búlingen jerdiń zalalyn ketirý úshin oǵan ák tóselip qoıyldy. Jambyl temir joly bólimshesiniń 2 apat-qalpyna keltirý poıyzynyń kúshimen kúkirt qyshqyly tógilgen sısterna saǵat 14:15-ke deıin ornynan alynyp, Zaýyt stansasyna komıssııanyń tekserýine jiberildi.
«Apattyń zardaptaryn joıý jumystary áli jalǵasyp jatyr. Osy zardaptardy joıý jónindegi jumystarǵa basshylyq jasaıtyn shtab quryldy», - dep habardar etti S.Muńataeva.
Oqıǵa bolǵan jerde oblystyq tótenshe jaǵdaılar departamentiniń jedel toby, jedel-qutqarý jasaǵy, «órt sóndirý jáne apat-qutqarý jumystary qyzmeti», sondaı-aq oblystyq jáne qalalyq ákimdikter ókilderi, oblystyq ishki ister departamenti, qaýipsizdik komıteti departamenti, tutynýshylar quqyǵyn qorǵaý, oblystyq ekologııa basqarmasy, «Qazfosfat» JShS sekildi tıisti uıymdardyń ókilderi jumys jasap jatyr.
Qurban bolǵandar men zardap shekkender joq.
Qurysh Nurymbet.