BUU derekterine súıensek, dúnıejúzindegi árbir úshinshi áıel ómirinde keminde bir ret zorlyq-zombylyqqa tap bolǵan. Búginde zardap shekkenderdiń sany 1,3 mıllıard adamǵa jýyqtaıdy. Al sıfrlyq keńistiktiń keńeıýi jańa qaterlerdi kúsheıtip otyr. Onlaın-qorlaý, qýdalaý, ruqsatsyz ıntımdik kontent taratý, dıpfeık – bári qaýipsizdikke tikeleı áser etedi. Alaıda álem memleketteriniń 40 paıyzynan azynda ǵana ınternettegi zorlyq-zombylyqpen kúresýge arnalǵan naqty zańnamalar bar, dep jazady Egemen.kz.
Bul – 1,8 mıllıard áıeldiń quqyqtyq qorǵanyssyz ómir súrip jatqanyn bildiredi. Sondyqtan qoǵamnyń nazaryn osy taqyrypta ashyq ári mádenı turǵydan kóterý mańyzdy. Osy maqsatpen Astana qalasynda BUU-nyń «Genderlik zorlyq-zombylyqqa qarsy 16 kúndik belsendi is-qımyl» jahandyq naýqany aıasynda «Zorlyq-zombylyqqa jol joq» kınofestıvali ashyldy.
Is-sharany BUU Qazaqstandaǵy Turaqty úılestirýshi keńsesi, IýNFPA, IýNISEF, BUU Eriktileri, «BUU-áıelder» qurylymy, sondaı-aq inDrive jáne Alternativa jobasy birlesip uıymdastyrǵan. Festıval baǵdarlamasyna Qazaqstan, Qyrǵyzstan jáne Nepaldan kelgen tórt tolyqmetrajdy týyndy engizilgen. Kórsetilimder Astana men Shymkentte aldyn ala tirkelgen kórermender úshin tegin ótip jatyr.
Festıval ashylýynda kópshilik nazaryna Ashat Kýchınchırekovtyń «Baýyryna salý» fılmi usynyldy. Drama otbasylyq qatynastardy, dástúr men jeke sezim arasyndaǵy qaıshylyqtardy tereń qozǵaıdy. Kórsetilimnen keıin ótken pikirtalas barysynda akterler men sarapshylar mádenı normalar jáne qoldaý júıeleriniń róli týraly oı bólisti. Olardyń aıtýynsha, kıno – únsiz qalǵan taqyryptardy adamǵa jaqyn, túsinikti tilde jetkizýdiń eń áserli tásilderiniń biri.
Elimizdegi BUU turaqty úılestirýshisi Sarango Radnaragcha festıvaldiń basty maqsatyn bylaı túsindirdi:
«Kıno bizdi tolǵandyryp qana qoımaıdy, ol áreketke ıtermeleıdi. Syılastyqty kúsheıtip, bir-birimizdi tyńdaýǵa úıretedi. Árbir áıel ózin qaýipsiz sezinetin orta qalyptastyrý – ortaq mindet».
IýNISEF ókili doktor Rashed Mýstafa Sarvar da balalar men jasóspirimder úshin qaýipsiz aqparattyq jáne áleýmettik orta qurýdyń mańyzyn atap ótti.
«Ár bala óz quqyqtary qorǵalatynyna senetin qoǵamda ósýi kerek», dedi ol.
Uıymdastyrýshylardyń aıtýynsha, festıval naqty sheshim usynýdy emes, eń aldymen oılandyrýdy, dıalog qalyptastyrýdy maqsat etedi. О́ıtkeni kez kelgen áleýmettik ózgeris úndeý jasaýdan bastalady. Festıval ári qaraı Shymkentte jalǵasyn tapty. Munda qyrǵyz rejısseri Mırlan Ábdihalykovtyń fılmi kórsetildi. Fılm tirshiliktiń syrt kózge qalypty kórinetin tustarynda da adamnyń taǵdyryna salmaq túsiretin máseleler jasyrýly bolýy múmkin ekenin kórsetedi. Kınofestıvaldiń máni – bir oqıǵany emes, tutas qoǵamnyń jaýapkershiligin eske salý. Qatysýshylardyń pikirinshe, óner, bilim, zań, medıa jáne azamattyq bastamalar birigip áreket etkende ǵana adamdar bir-birine qaýipsiz orta qalyptastyra alady.