«Aýyl» partııasy respýblıkalyq «Aýyl naqyshtary» fotobaıqaýynyń qorytyndysyn jarııalady. Elimizdiń dástúrlerin saqtaý men nasıhattaý maqsatynda ótken baıqaý aýyl ómiriniń oń ımıdjin qalyptastyrýǵa úles qosqan mádenı joba boldy. Osy oraıda talaı talapty baq synasqan dúbirli dodada «Egemen Qazaqstan» gazetiniń fototilshisi Erlan Omar júldeli bolǵanyn aıta keteıik.
Marapattaý rásiminde úzdik jumystar kórmesiniń ashylýy ótip, Mádenıet jáne aqparat mınıstrliginiń qoldaýymen shyǵarǵan «Aýyl naqyshtary» atty kórkem fotoalbomy tanystyryldy.
«Aýyl naqyshtary» baıqaýy tek qana elimizdiń dástúrin saqtaý men nasıhattaýǵa arnalǵan mańyzdy is-shara ǵana emes, sonymen qatar fotosýret ónerin ilgeriletýge arnalǵan qýatty qural. Jyl saıyn baıqaýǵa qatysýshylar sany artyp, bizge aýyldyq ómirdiń sulýlyǵy men ereksheligin kórsetýge múmkindik beredi», deıdi «Aýyl» partııasynyń tóraǵasy Serik Egizbaev.
«Aýyl peızajdary», «Eńbek adamynyń fotoportreti», «Fotoreportaj», «Aýyldaǵy baqytty balalyq» atty atalymdarynda ótken bıylǵy baıqaýǵa elimizdiń túkpir-túkpirinen 678 qatysýshy qatysqan. Jalpy, 3366 fotosýret usynylǵan. Sondaı-aq «Kórermender kózaıymy» atalymynda áleýmettik jeli qoldanýshylary unaǵan fotosýretti tańdaı aldy. Telegram chatynda usynylǵan 10 úmitkerden daýys berý arqyly jeńimpaz anyqtaldy.
Baıqaý jeńimpazdary sertıfıkattar men baǵaly syılyqtarmen marapattalyp, jalpy júlde qory 3 900 000 teńgeni qurady.
Sonymen, fotobáıgeniń qorytyndy sheshimimen, bas júlde – Maksat Shaǵyrbaev (Shymkent), «Aýyl peızajdary» atalymynda 1-oryn – Dosjan Balabekuly (Almaty) 2-oryn – Meıirbek Tajkýranov (Batys Qazaqstan oblysy) 3-oryn – Erlan Omarov (Astana), «Eńbek adamynyń fotoportreti» atalymynda 1-oryn – Erjan Nurpeısov (Atyraý oblysy), 2-oryn – Tleýbek Shaıahmet (Shyǵys Qazaqstan oblysy), 3-oryn – Qaısar Sherimov (Shymkent), «Fotoreportaj» atalymynda 1-oryn – Meıirbek Tajkýranov (Batys Qazaqstan oblysy), 2-oryn – Erlan Omarov (Astana), 3-oryn – Azamat Hýsaınov (Almaty), «Aýyldaǵy baqytty balalyq» atalymynda Mırat Qorjynbaev (Batys Qazaqstan oblysy), «Kórermender kózaıymy» atalymynda Marks Qalqamanov (Atyraý oblysy) júldeli boldy.