Astanada aýyl mektepteri oqýshylaryna arnalǵan jaratylystaný-matematıkalyq baǵyttaǵy respýblıkalyq olımpıada óz máresine jetti. Qorytyndy kezeńge elimizdiń óńirlerinen 475 oqýshy qatysyp, olardyń 200-i jeńimpaz jáne júldeger atandy, dep habarlaıdy Egemen.kz.
Marapattaý rásimine Oqý-aǵartý vıse-mınıstri Maıra Meldebekova qatysty. Vıse-mınıstr óz sózinde daryndy balalardy qoldaý jáne adam kapıtalyn damytý memlekettiń basty basymdyqtarynyń biri ekenin atap ótti.
«Memleket adam kapıtalyn damytý men daryndy balalardy qoldaýǵa erekshe nazar aýdarady. Aýyl mektepterine arnalǵan respýblıkalyq olımpıada – osy maqsattarǵa qol jetkizýdegi mańyzdy quraldyń biri. Intellektýaldyq saıystarǵa qatysý tereń bilimdi ǵana emes, joǵary jaýapkershilikti de talap etedi. Sizder adal ári tartysty básekede óz bilimderińizdi dáleldep, úzdik nátıjelerge qol jetkizdińizder. Úlken jeńisterińizben quttyqtaımyn», dedi vıse-mınıstr.
Bıylǵy olımpıadada 200 medal sarapqa salyndy: 36 altyn, 66 kúmis jáne 98 qola. Komandalyq esep boıynsha Gran-prı Mańǵystaý oblysynyń komandasyna tabystaldy.
«Úzdik olımpıadalyq komanda» nomınasııasy boıynsha I dárejeli dıplomdy Almaty oblysynyń quramasy, II oryndy Atyraý jáne Aqmola oblystarynyń komandalary, III dárejeli dıplomdy Qyzylorda jáne Batys Qazaqstan oblystarynyń komandalary ıelendi.
Jeńimpazdar elimizdiń jetekshi joǵary oqý oryndarynyń bes rektorlyq grantymen marapattaldy. Onyń ishinde: SDU – 2 grant, Satbayev University – 1 grant, Qaraǵandy tehnıkalyq ýnıversıtetinen – 2 grant.
Olımpıadanyń qorytyndy kezeńine qatysqan barlyq fınalıster aldaǵy ıntellektýaldyq jarystarǵa daıarlaý maqsatynda «Daryn» respýblıkalyq syrttaı mektebine qabyldanady. I dárejeli dıplom ıegerleri 2026 jylǵy naýryz aıynda ótetin respýblıkalyq olımpıadanyń qorytyndy kezeńine qatysý múmkindigin alady.
Aıta keteıik, aýyl mektepteri oqýshylaryna arnalǵan respýblıkalyq olımpıada jaratylystaný-matematıkalyq jáne qoǵamdyq-gýmanıtarlyq baǵyttaǵy 13 pán boıynsha tórt kezeńde uıymdastyryldy. 2025-2026 oqý jylynda olımpıadanyń mektep kezeńine 125 myń oqýshy qatysqan. Fınalǵa 1000-ǵa jýyq qatysýshy ótti, olardyń 475-i jaratylystaný-matematıkalyq baǵyt boıynsha synǵa tústi. Qoǵamdyq-gýmanıtarlyq baǵyttaǵy olımpıada 9-14 jeltoqsan kúnderi Astana qalasynda ótedi.