Ulttyq qorǵanys ýnıversıtetiniń Ulttyq ulan fakýltetinde elimizdiń áskerı ǵylym calasyna eleýli úles qosqan ǵalym, polkovnık Qanat Tóleńgitov atyndaǵy oqý aýdıtorııasy ashyldy. Is-sharaǵa Qaýipsizdik Keńesi hatshysynyń birinshi orynbasary, general-polkovnık Rýslan Jaqsylyqov, Ulttyq ulan Bas qolbasshysynyń orynbasary, general-maıor Baýyrjan Ábjanov, Ulttyq qorǵanys ýnıversıtetiniń bastyǵy, general-maıor Asqar Mustabekov, t.b. áskerı laýazymdy tulǵalar qatysty.
Petropavldaǵy Ishki áskerler ýchılıshesi (qazirgi Ulttyq ulan akademııasy) men Ulttyq qorǵanys ýnıversıtetindegi Ulttyq ulan fakýltetiniń qurylý tarıhyna toqtalǵan R.Jaqsylyqov quqyqtyq tártip áskerine bilikti, joǵary sanatty ofıserler aýadaı qajet bolǵanyn eske aldy. Ol ýaqytta Ishki áskerde joǵary áskerı bilimi bar nebári 7-aq ofıser qyzmet etse kerek. Al jeke quramǵa júktelgen mindetter kún saıyn ulǵaıyp, kúrdelene túsken edi.
«Jaýyngerlerimiz qoǵamdyq tártipti qamtamasyz etýde kún saıyn qıyndyqtarǵa tap bolatyn, buzaqylar toptaryna tosqaýyl bolýda, terrorızmmen kúreste de qıyndyqtar týdy. Ýaqyt bizden basqarý júıesiniń zaman aǵymyna, elimizde oryn alyp jatqan ózgerister men oqıǵalarǵa sáıkes boldy. Joǵary oqý ornyn ashý jolynda qanshama ýaqyt ketti. Degenmen maqsatymyzǵa qol jetkizdik. Tuńǵysh ret zań júzinde quqyqtyq tártip áskeriniń bilim ordasyn qurdyq. Osy fakýltetti de qandaı maqtanyshpen ashqanymyz áli esimde», dedi ol.
Rýslan Fatıhuly Petropavldaǵy ishki ásker ýchılıshesin áskerı ınstıtýt etip qaıta reformalaý máselesi de úlken jumys bolǵanyn áńgimeledi. Ol bul jumystyń bári óz isin sheksiz súıgen ofıserlerdiń arqasynda júzege asqanyn aıtty.
«Búgingi aýdıtorııaǵa esimi berilip otyrǵan polkovnık Tóleńgitov te óziniń jeke ýaqytyn, tipti ómirin arnaǵanyna men kýámin. Ol kezde ınstıtýt bastyǵynyń orynbasary polkovnık Ahmetov edi, Qanat Faızrahmanuly ekeýiniń eńbegi kóp sińdi», dedi general-polkovnık.
Ulttyq ulan Bas qolbasshysynyń orynbasary, general-maıor Baýyrjan Ábjanov: «Qanat Faızrahmanulyn áskerı pedagogıka salasynyń belsendi arhıtektory dep esepteımin. Onyń ıdeıalary, eńbekteri men oqý-zertteýleri, áskerı ǵylymǵa degen kózqarasy – kadrlyq ofıserler daıarlaý júıesine tirek boldy dep nyq senimmen aıtýǵa bolady. Sondyqtan ǵalymnyń esimin ulyqtaýdy – onyń kásibı murasyn jas býynǵa úlgi etý jáne el múddesine adal qyzmet etýdiń qundylyǵyn dáripteý dep túsiný kerek», dedi.
Ulttyq qorǵanys ýnıversıtetiniń bastyǵy, general-maıor Asqar Mustabekov Qanat Tóleńgitovpen birge qyzmet etpese de, búginde ýnıversıtet sol kisiniń jasap ketken eńbeginiń jemisin kórip otyrǵanyna toqtaldy.
«Onyń ǵylymı eńbekterimen tanysyp, ol kisiniń parasatty adam, óz eliniń patrıoty, esimi bas árippen jazylar ofıser ekenine kózim jetti. Sebebi ol qysqa ǵana ǵumyrynda óte úlken is atqardy, saýapty is jasady, áskerı bilimdi damytý jolynda qyzmet etip, iz qaldyrǵan azamat boldy. Bar-joǵy 42 jyl ómir súrip, mundaı úlken isti tyndyrý ekiniń biriniń qolynan kelmeıdi», dedi ol.
Ǵalym atyn ıelengen aýdıtorııada polkovnık Qanat Tóleńgitovtiń ǵylymı eńbekteri, áskerı qyzmettegi jetistikteri men ómir joly týraly baıandalǵan taqta ornalastyrylǵan. Fakýltet basshysy, polkovnık Saverdın Imırov ashylý saltanatynda bul aýdıtorııa bolashaq ofıserlerdi daıarlaý isinde, ǵylymı zertteý jumystaryn júrgizýde ári áskerı-patrıottyq tárbıeni nyǵaıtýda mańyzdy ról atqaratynyn aıtty. Ol ǵalymnyń anasy Sáken Muqajanqyzy men aıaýly jary, polkovnık Era Muhamedjanqyzyna syı-sııapat kórsetip, gúl shoqtaryn usyndy.