Qarjylyq monıtorıng agentiginiń (QMA) atalǵan óńir boıynsha departamenti medısınalyq jabdyqtardy satyp alý kezinde bıýdjet qarajatyn urlaý faktisi boıynsha tergeý júrgizip jatyr, dep habarlaıdy Egemen.kz QMA málimetine silteme jasap.
«Qazyǵurt aýdandyq ortalyq aýrýhanasy» (MKK) burynǵy bas dárigeri medısınalyq gazben jabdyqtaý júıesine arnalǵan qurylǵylardy satyp alý kezinde olardy jasandy túrde birneshe bólikke bólip, keıin kóptegen kelisimsharttar jasaý arqyly satyp alýdy uıymdastyrǵan.
Shemany júzege asyrý úshin ol medısınalyq buıymdardy jetkizý salasynda tájirıbesi bar tanysyn tartqan. Ol ózine baǵynysty, týystary men tanystarynyń atyna tirkelgen kommersııalyq uıymdardy paıdalanǵan. Osy kompanııalardyń atynan ádeıi asyra kórsetilgen kommersııalyq usynystar daıyndalǵan.
Sonymen qatar jabdyqty is júzinde basqa kompanııa jetkizgenimen, qabyldaý aktileri men kelisimsharttar baqylaýyndaǵy fırmalar arqyly rásimdelgen.
Aýrýhanadan atalǵan kompanııalardyń esepshottaryna qarjy túskennen keıin kúdiktiler qarajatty qolma-qol aqshalaı alyp, ózara bólisken.
Memleketke keltirilgen jalpy shyǵyn 115 mln teńgeni qurady.
Qylmystyq jolmen alynǵan tabysqa kúdikti elordadan 2 bólmeli páter satyp alǵan, sot sanksııasymen bul múlikke tyıym salyndy.
Burynǵy bas dárigerge qatysty bultartpaý sharasy retinde kepil qoldanyldy, al onyń sybaılasy úı qamaqta otyr.
Qylmystyq-prosessýaldyq kodekstiń 201-baby boıynsha ózge aqparat jarııalanbaıdy.