Oblystyq úlken jıynnan keıin aýdan ortalyǵynan shalǵaı jatqan Qopa aýylyna qaraı jyryla bólinip shyqqandaǵy maqsatymyz – belgili jattyqtyrýshy Juman Jetibaevtyń qurmetine arnalǵan aýdandyq voleıbol jarysyn kórip qaıtý edi, dep jazady Egemen.kz.
Juman Asqaruly pedagogıkalyq jáne jattyqtyrýshy retindegi eńbek jolyn 1982 jyly bastaǵan eken. Sodan beri taban aýdarmaı, uzaq jyldar boıy jeńil atletıka men voleıboldan aýdandyq, oblystyq jáne respýblıkalyq jarystardyń talaı jeńimpazdary men júldegerlerin tárbıelegen maıtalman bapker. Búginde ol zeınetke shyǵyp, Qopa aýylynda turyp jatyr. Aýyl turǵyndary men shákirtteri onyń eńbegine degen alǵysy bólek.
Sóıtip Aıagóz aýdanynyń zor qurmetine ıe bolǵan jattyqtyrýshy Juman Asqarulyna arnalǵan aýdandyq voleıboldan ashyq týrnırge Emeltaý, О́rken, Aqshı, Qosaǵash, Qopa aýyldary, Aqtoǵaı kenti jáne №8 mektep, S. Seıfýllın atyndaǵy mektep ujymdarynan quralǵan úzdik segiz komanda saıysqa tústi.
Tartysqa toly bolǵan dop dodasynda Qopa aýylynyń qurama komandasy I oryn ılense, II oryn О́rken aýylynyń qurama komandasy, III oryn Emeltaý qurama komandasy boldy. Týrnırge qarjylaı qoldaý kórsetken KAZ Minerals Aktogay kompanııasynyń atynan jeńimpaz atanǵan I orynǵa – 300 myń, II orynǵa – 200 myń, III orynǵa – 100 myń teńge aqshalaı syılyqtarmen jáne júldegerler kýboktarmen, dıplomdarmen marapattaldy.
Qurmet pen alǵys belgisi retinde shákirtteri belgili jattyqtyrýshy syıly Juman Jetibaevqa ıyǵyna shapan jaýyp, astyna at mingizdi.
«Bul Juman Asqarulynyń el sportyn damytýǵa jáne jas býyndy sportqa tárbıeleýge qosqan kópjyldyq eńbegine kórsetilgen qurmet. Bul tek kásibı sport qana emes, buqaralyq sportty damytýǵa jasalyp jatqan is-shara. Oǵan qarjylaı qoldaý bildirip jatqan demeýshilerge alǵys aıtamyz. Týrnır joǵary deńgeıde ótti», deıdi uıymdastyrýshylar.
Abaı oblysy