Atyraý oblysy ákiminiń tóraǵalyǵymen jedel shtabtyń kezekti otyrysy ótip, qolaısyz aýa raıynyń saldaryn joıý jáne aımaqtyń tirshilikti qamtamasyz etý júıeleriniń jumysyn qamtamasyz etý máseleleri qaraldy, dep jazady Egemen.kz.
Qazgıdromet málimetinshe, búgin Inder aýdanynda jeldiń ekpini 30 m/s-qa, Atyraý qalasynda 24 m/s-qa deıin jetken. Túnde oblys boıynsha jel 23–28 m/s-qa kúsheıip, erteń kúndiz 18 m/s, keshke qaraı 15–18 m/s bolady dep kútilýde. Sol sebepti barlyq qyzmet kúsheıtilgen rejımdegi jumysty jalǵastyrýda.
Tótenshe jaǵdaılar departamenti ushqan shatyrlardy jınaý jáne demontaj jumystaryn uıymdastyrdy, avtojoldardyń jekelegen ýchaskeleri jabyldy, tasjoldarǵa kezekshilik qoıylyp, jylyný qosyndary ashyldy jáne qutqarý brıgadalary jumyldyryldy.
Oblys aýdandarynda birqatar nysanǵa zaqym kelgen. Inder aýdanynda 6 nysannyń shatyry búlinip, elektrmen jabdyqtaýdy qalpyna keltirý jumystaryna 7 brıgada men 8 tehnıka tartylǵan. Maqat aýdanynda mekteptiń shatyry buzylǵan, elektr jelilerin qalpyna keltirýge 6 apattyq brıgada jumyldyryldy. Mahambet aýdanynda eki nysan — aýdandyq emhana men 60 páterli turǵyn úıdiń shatyrlaryna zııan kelip, 5 brıgada jumys isteýde. Qurmanǵazy aýdanynda mektep, mádenıet úıi, ambýlatorııa jáne sport zalyna zardap tıgen. Atyraý qalasynda 7 nysannyń shatyry men qasbeti búlingen. Isataı jáne Qyzylqoǵa aýdandarynda jaǵdaı turaqty, kúshti jeldiń aıtarlyqtaı zııany tirkelmegen.
Serik Shápkenov búlingen nysandardy jedel oqshaýlap, adamdardyń qaýipti aýmaqtarǵa kirýine jol bermeýdi, sondaı-aq polısııa organdarymen birge ushqan shatyrlardy ýaqytynda jınaý jáne demontaj jumystaryn aıryqsha baqylaýda ustaýdy tapsyrdy.
Búlingen nysandardyń ákimshiligine jáne salalyq basqarmalarǵa áleýmettik nysandardy qalypqa keltirý boıynsha aldyn ala esepterdi dereý daıyndaý, oǵan rezervtik qordan qajetti qarajat bólýdi qarastyrý, al kepildik merzimi aıaqtalmaǵan nysandardy jóndeýdi merdiger uıymdardyń kepildik mindettemeleri aıasynda qamtamasyz etý júkteldi.
“Atyraý Jaryq” JShS málimetinshe, oblys boıynsha 105 núktede elektr jaryǵynyń sónýi tirkelgen. Negizgi sebep — symdardyń úzilýi jáne bir-birimen aıqasýy. Aqaýlardy joıýǵa 40 brıgada jumyldyrylǵan, onyń 11-i Atyraý qalasynda. Qalypqa keltirý jumystary táýlik boıy júrip jatyr, 85 paıyzy aıaqtaldy.
Oblys ákimi dıspetcherlik qyzmetterdiń jumysyn kúsheıtýdi jáne qalypqa keltirý jumystarynyń merzimi jaıynda turǵyndardy ýaqytynda habardar etip otyrýdy tapsyrdy. Sondaı-aq avtojoldardaǵy qozǵalys shekteýleriniń saqtalýyna baqylaýdy kúsheıtý, halyq arasynda túsindirý jumystaryn júrgizý, tasjoldarda ýaqytsha toqtap turǵan júrgizýshiler men jolaýshylardy ystyq tamaqpen qamtamasyz etýdi uıymdastyrý júkteldi.
— Balalardyń qaýipsizdigin qamtamasyz etý maqsatynda bilim berý nysandaryn aýa raıy turaqtalǵansha onlaın oqytý formatyna kóshirý qajet. Buǵan qosa, jeldiń kúsheıýine baılanysty búliný qaýpi bar ǵımarattar men qurylystarǵa turaqty monıtorıng júrgizilýi tıis. Uıym basshylaryna táýlik boıy kezekshilik uıymdastyrýdy tapsyramyn, — dedi oblys ákimi.
Qazgıdromet boljamyna sáıkes, 15 jeltoqsannyń keshine deıin boran soǵady.