Qaıtarylǵan aktıvterdi basqarý kompanııasy qazaqstandyq olıgarhtardan tárkilengen zergerlik buıymdardy aýksıonǵa shyǵardy, dep habarlaıdy Egemen.kz.
Qaıtarylǵan aktıvterdi basqarý kompanııasynyń (QABK) málimetinshe, 30 jeltoqsanda aktıvterdi qaıtarý aıasynda qazaqstandyq olıgarhtardan tárkilengen áshekeılerdi satý boıynsha qaıta aýksıon ótedi. Bul – alǵashqy saýdada ótpeı qalǵan múlik.
– Aýksıonǵa kádesyı monetalar, zergerlik buıymdar men qolsaǵattar qoıylady. Barlyǵy 39 lot. Jalpy bastapqy baǵasy – 631 mln 839 myń 861 teńge, – delingen resmı habarlamada.
QABK Jańa jyl qarsańynda satýǵa usynatyn barlyq áshekeılerdi elektrondy saýda portaly arqyly kórýge bolady. Eń arzan lot – ulttyq oıý-órnekpen bezendirilgen, kúmis qaptamasy bar bylǵary beldik. Onyń baǵasy – 262,5 myń teńge.
Sondaı-aq salystyrmaly túrde arzan sanalatyn buıymdardyń biri – gaýhar tastarmen áshekeılengen aq altynnan jasalǵan kóbelek beıneli alqa. Ol 280,5 myń teńgege baǵalanǵan. Qalǵan lottardyń baǵasy aıtarlyqtaı joǵary (jáne nege áli kúnge deıin satyp alýshy tabylmaǵany da túsinikti). Ártúrli alqalar, syrǵalar, júzikter men basqa da áshekeıler júzdegen myń teńgeden bastalyp (mysaly, laǵyl tasy bar júzik – 627,3 myń teńge), kóbine mıllıondaǵan teńgege deıin jetedi.
Eń qymbat eki zergerlik buıym – Van Cleef & Arpels tizbegi (46,7 mln teńgeden asady) jáne De Beers syrǵalary (shamamen 134,4 mln teńge). Bul lottar birneshe ret aýksıonǵa qoıylǵanymen, tipti tómendetilgen baǵamen de satyp alýshy tabylmaǵan.
Almaspen áshekeılengen altyn jáne platınadan jasalǵan syrǵalar, kýlon men júzikter jıyntyq retinde satylymǵa shyǵarylǵan. Olardy satyp alý úshin 72 mln 692 myń teńge tóleý qajet.
Qymbat lottardyń qatarynda birneshe qolsaǵat bar. Máselen, asyl tastarmen kómkerilgen sıferblaty bar Frank Muller Geneve saǵaty – 24,8 mln teńge. Sondaı-aq Ulysse Nardin Archive Freak Cruiser qolsaǵaty 24,7 mln teńgege baǵalanǵan (korpýsyndaǵy syzattar bolmasa, baǵasy odan da joǵary bolýy múmkin edi).
Al bul sanattaǵy eń qymbat lot – shekteýli, bar bolǵany 30 dana bolyp shyǵarylǵan Ulysse Nardin Classic 789-80 hronometri. Platına korpýsymen, avantıýrın sıferblatymen jáne qolmen oıylyp jasalǵan altynnan quıylǵan shaıqasyp jatqan jaýyngerler beınesimen erekshelenetin bul saǵattyń baǵasy – 182,2 mln teńge.