10 jeltoqsan kúni úlken ekranǵa shyqqan «Rýyń kim» fılmi endi kınoteatrlardan kórsetilmeıdi. Kúni keshe Májilis depýtaty Erlan Saırov synǵa alǵan fılm prokattan alynyp tastaldy. Bul týraly fılmdi túsirgen Tiger Films prodıýsserlik ortalyǵy áleýmettik jelidegi paraqshasynda málimdedi, dep jazady Egemen.kz.
Fılm prokatqa shyqqan ýaqyt aralyǵynda 208 mıllıon teńge kassa jınaǵan. Tiger Films prodıýsserlik ortalyǵy fılmdi talqylaý barysynda qoǵamdyq shıelenistiń aldyn alý úshin kınoteatrlardyń repertýarynan alyp tastaý týraly sheshim qabyldaǵan.
«Biz fılmdi eń izgi, oń nıetpen túsirdik. Basty maqsatymyz – Qazaqstan halqyn birlik pen tatýlyqqa úndeý. Satıra men ıýmor tili arqyly rýlarǵa bóliný, bir rýdy ekinshisinen joǵary qoıýǵa umtylý qate túsinik ekenin kórsetkimiz keldi. Bizdiń tarapymyzdan zańbuzýshylyq bolǵan joq. Alaıda fılmge qatysty ekiushty pikirler týyndap, ony talqylaý barysynda qoǵamdyq shıelenistiń bolmaýy úshin, biz fılmdi Qazaqstandaǵy barlyq kınoteatrlardyń repertýarynan óz erkimizben alyp tastaý týraly sheshim qabyldadyq», delingen prodıýsserlik ortalyqtyń málimdemesinde.
Aıta keteıik, Májilis depýtaty E.Saırov Úkimet basshysy Oljas Bektenovke joldaǵan saýalynda «Rýyń kim» fılminiń qajetsiz taqyrypty arqaý etkenine nazar aýdarǵan bolatyn.
«Qazaqtyń rýlaryn salystyratyn, kemsitetin fılmderdiń maqsaty qandaı? Tipti bul fılmdi jarnamalaý úshin jasalǵan arnaıy ekspozısııada rýǵa bólinýdi qoıyp, Qazaqstannyń kartasyn úsh júzge bólip qoıǵanyn kórdik. Bul ne degen bassyzdyq? Ol ult úshin eń sezimtal taqyrypty aıqaılatyp áleýmettik kontent, kıno taqyrybyna aınaldyryp, kórermen jınaý. Túbi bul jaqsylyqqa ákelmeıdi», degen edi depýtat.
Májilismen jasóspirimder úshin kıno jáne medıakontenttiń tárbıelik yqpaly joǵary ekenin eskerip, osyǵan qatysty birshama usynysyn ortaǵa salǵan edi.