Jaqynda ǵıbratty ǵumyr keship, sońyna óshpesteı ónegeli iz qaldyrǵan Memlekettik syılyqtyń laýreaty, fılologııa ǵylymdarynyń doktory, professor, birtýar abaıtanýshy Mekemtas Myrzahmetulynyń ǵylymı muralaryna arnalǵan respýblıkalyq ǵylymı-praktıkalyq konferensııa ótti.
Ǵalymnyń esimin este qaldyrý maqsatynda Túlkibas aýdanynyń ákimdigi men janashyr aǵaıyn tarapynan birqatar aýqymdy sharalardy júzege asyrý da qolǵa alynyp jatyr. Sondaı ıgi sharalardyń qatarynda Qazaq rýhanııatynyń abyzy Mekemtas Myrzahmetulyna arnap, óziniń týǵan jeri Túlkibas aýdany, Túrkibasy aýylynda salynyp jatqan «Shiltóbe – Mekemtas bıigi» taǵzym kesheniniń tehnıkalyq ashylý rásimine qatystyq. Biz, Darhan Myńbaı bastaǵan birqatar azamat eń aldymen Mekemtastaı ǵulama aǵamyzdyń rýhyna minájat etip, taǵzym kesheniniń qurylys jumystarymen tanystyq. Keshenge jazylǵan sózderde qate ketpeýin qadaǵalap, óz pikirimizdi ortaǵa saldyq. Sodan keıin aýyl meshitinde berilgen asqa qatysqan qonaqtar qazaq ádebıetiniń asa kórnekti ókili, ult rýhanııaty úshin eren eńbek sińirgen ǵalymnyń mol murasyn nasıhattap, ony el-jurtqa keńinen tanytatyn Mýzeıdi ashý, jyl saıyn 16 jeltoqsanda ǵylymı konferensııalar uıymdastyrý, taǵy basqa da máselelerdi kóterdi. Jınalǵan qaýym osy aıtylǵan usynystardyń barlyǵyn da bir aýyzdan qoldady.
Aıtpaqshy, aýdannyń belsendi azamattary taǵzym keshenine qatysty aıtqan bir-eki eskertýlerimizdi oryndy dep qoldap, bir aptada túzetip qoıǵanyna rıza boldyq.
«Jumyla kótergen júk jeńil» degendeı, Mekemtas aǵanyń shákirtteri men aǵaıyndardyń kúshimen «Shiltóbe – Mekemtas bıigi» taǵzym kesheni boı kóterip, oǵan baratyn joldy da tegistep, asfalttap qoıypty. Bir sózben aıtqanda, aldaǵy ýaqytta munda kelgen adamdar ǵulama aǵamyzǵa minájat etip, M.Myrzahmetulynyń rýhyna Quran baǵyshtap, taǵzym keshenin kórip tamashalaýyna tolyq múmkindik jasalǵan.
Mekemtas Myrzahmetuly búkil sanaly ǵumyryn Abaıtaný, Iаsaýıtaný, Baýyrjantaný, Muhtartaný muralaryn zerdeleýge, olardy halyqqa tanytýǵa, otandyq onomastıka, ádebıettaný ǵylymdarynyń keregesin keńeıtýge arnaǵan ǵulama bolǵany bárimizge belgili. Mákeń uzaq jyldar boıy ult rýhanııatynyń ilgeri basýyna súbeli úles qosyp, kóptegen shákirt tárbıeledi. Uzaq jylǵy qajyrly izdenisterinen týǵan qundy eńbekteri bılik pen oqyrman tarapynan joǵary baǵaǵa ıe boldy. Elge, ádebıet pen ǵylymǵa sińirgen súbeli eńbekterin eskere otyryp, bolashaqta jeltoqsan aıyndaǵy bir kúndi «Mekemtas kúni» dep belgileý máselesin qarastyrý jaǵyn Úkimetke usynamyz. Bul usynysty zııaly qaýym ókilderi de qoldaıdy degen senimiz mol.
Qabyl DÚISENBI,
jýrnalıst, qoǵam qaıratkeri