QOSTANAI. 11 tamyz. Qostanaı oblysynda at sporty túrlerinen oblystyq chempıonat ótti. Onda Qostanaı aýdanynyń sportshylary barlyq qarsylastarynan basym tústi. Bul týraly egemen.kz tilshisi habarlady.
At sporty túrlerinen Qostanaı aýdanynyń Zarechnyı selosyndaǵy «Arǵymaq» atshabarynda ótken oblystyq chempıonatqa 12 aýdannan shabandozdar men sportshylar qatysty. Chempıonat baǵdarlamasy at sportynyń qyz qýý, aýdaryspaq, kókpar, teńge alý, sonymen qatar 2 400, 3 200, 12 000, 24 000 metr qashyqtyqqa shapqan báıge túrlerin qamtydy. Osy jarystardyń barlyǵynda da komandalyq esep boıynsha Qostanaı aýdanynyń sportshylary basymdyq tanytty. Mysaly, qyz qýýǵa Qostanaı aýdany men Sarykól aýdanynan eki jup shyqty. Qostanaılyq Aısara Asan sarykóldik Dáýlet Balkenov men Gúlmıra Jaqypovadan basym tústi.
Aýdaryspaqta sportshylar 60 kg., 70 kg., 80 kg. jáne 90 kg. salmaqta básekege tústi. Onda Denısov aýdanynan kelgen Dıdar Mustafın (60 kg.), Qostanaı aýdanynyń myqtysy Baýyrjan Koıanbaev (70 kg.), taǵy Qostanaı aýdanynyń ókili Darhan Salmanov (80 kg.) jáne Denısov aýdanynyń týmasy Aıdos Jumaǵulov (90 kg.) jeńimpaz atandy.
Kókpardan Qostanaı aýdanynyń kókparshylaryna eshkim shaq kelmedi. Alaman báıgede naýryzymdyq atbegi Sáken Qarmanovtyń arǵymaǵy birinshi bolyp máreni qıdy. Sonymen jalpy esepte Qostanaı aýdanynyń komandasy 64 upaı jınap, top jardy. Ekinshi oryndy Qarasý aýdany alsa, úshinshi oryn sarykóldikterge buıyrdy.
Názıra Járimbetova.
Derek: egemen.kz.
Sýret: ng.kz.