Elde júrgizilip jatqan júıeli sharalardyń nátıjesinde dárigerler tapshylyǵy ótken jylmen salystyrǵanda 19 paıyzǵa, al orta býyn medısınalyq qyzmetkerler tapshylyǵy 7 paıyzǵa azaıdy, dep habarlaıdy Egemen.kz.
Málimetke sáıkes, ınfeksııalyq stasıonarlar men alǵashqy medısınalyq-sanıtarııalyq kómek uıymdary qyzmetkerleriniń eńbekaqysy jyl saıyn ósip otyrǵanyna qaramastan, jedel járdem qyzmeti mamandary arasynda jalaqynyń tómendigi men eńbek jaǵdaıynyń kúrdeliligine qatysty áleýmettik rezonans saqtalyp otyr. Atalǵan másele Mańǵystaý oblysyndaǵy Jańaózen qalasynda jáne Qaraǵandy oblysynyń Temirtaý qalasynda baıqalady.
Osyǵan baılanysty Densaýlyq saqtaý mınıstrligi jalaqyny arttyrýǵa baǵyttalǵan birqatar usynys ázirledi. Atap aıtqanda, 2026 jylǵy 1 qańtardan bastap erekshe eńbek jaǵdaılary úshin ústemaqy engizý arqyly atalǵan qyzmetterde jumys isteıtin 37 myńǵa jýyq qyzmetkerdiń eńbekaqysyn kóbeıtý kózdelip otyr. Bul maqsatqa jyl saıyn shamamen 32,4 mlrd teńge kóleminde qosymsha qarjy qajet bolady.
Qabyldanyp jatqan sharalardyń nátıjesinde aýyldyq jerlerdegi dárigerler tapshylyǵy da 16 paıyzǵa qysqarǵan. Sonymen qatar, 2025 jyl alǵashqy medısınalyq-sanıtarııalyq kómek mamandarynyń biliktiligin arttyrý jyly bolyp jarııalandy.
Bul sheshim bazalyq medısınalyq kómektiń sapasyn arttyrýdy kózdeıdi. О́ıtkeni alǵashqy medısınalyq-sanıtarııalyq kómek búkil densaýlyq saqtaý júıesiniń irgetasy sanalady.
Qazirgi ýaqytta dárigerler men meıirgerlerdi jappaı oqytý jumystary júrgizilip, jańa bilim berý baǵdarlamalary men zamanaýı praktıkalyq oqytý ádisteri engizilip jatyr.
Sonymen qatar medısınalyq qyzmetkerlerdi qorǵaý maqsatynda kásibı jaýapkershilikti saqtandyrý ınstıtýty engizildi. Budan bólek, medısına qyzmetkerlerine shabýyl jasaǵany úshin Qylmystyq kodekske jeke bap engizý máselesi boıynsha zańnamany jetildirý jumystary qolǵa alynǵan.