Memleket basshysy Qasym-Jomart Kemeluly Toqaevtyń bastamasymen júzege asyrylyp jatqan «Keleshek mektepteri» ulttyq jobasy óńirlerde sapaly bilim alýǵa teń múmkindik qalyptastyrýǵa baǵyttalǵan. Osy ulttyq joba aıasynda Túrkistan oblysynda 29 jańa mektep salynsa, onyń ishinde Saýran aýdanynda úsh zamanaýı mektep paıdalanýǵa berilip, balalar men ustazdar úshin qolaıly ári qaýipsiz bilim berý ortasy qalyptasty.
Jańa mektepterdiń ashylýy aýdandaǵy úsh aýysymda oqý, apatty jáne eski ǵımarattarda bilim berý máselelerin sheshýge naqty serpin berdi. Bul eń aldymen oqýshylardyń densaýlyǵy men bilim sapasyna oń áser etip, pedagogterdiń zamanaýı talaptarǵa saı jumys isteýine múmkindik týǵyzdy. Ulttyq joba tek jańa ǵımarattar salýmen shektelmeı, aýyl men qala arasyndaǵy bilim sapasyn teńestirýge, balalardyń qabiletin ashýǵa jáne ustaz eńbegin qoldaýǵa baǵyttalǵan mańyzdy bastama bolyp otyr.
Saýran aýdany bilim bóliminiń basshysy Ǵanı Baqytulynyń aıtýynsha, «Keleshek mektepteri» – bolashaq urpaqtyń zııatkerlik áleýetin arttyrýǵa arnalǵan keshendi joba.
«Bul mektepter – balalardyń qaýipsiz, jaryq ári zamanaýı ortada bilim alýyna jasalǵan naqty jaǵdaı. Sonymen qatar muǵalimder úshin de jańa múmkindikter ashyldy. Zerthanalarmen, STEM jáne robototehnıka kabınetterimen jabdyqtalǵan mektepter ustazdardyń kásibı sheberligin shyńdap, oqytý úderisiniń sapasyn arttyrýǵa múmkindik beredi», dedi ol.
Eńbekshi Dıqan aýylynda ashylǵan 600 oryndyq №4 jalpy bilim beretin mektep birneshe eldi mekendegi oqýshy júktemesin azaıtyp, úsh aýysymda oqý qaýpin joıdy. Búginde mektep bir aýysymda jumys istep, júzdegen balanyń sapaly bilim alýyna jaǵdaı jasap otyr. Al S.Qojanov aýylynda buryn apatty jaǵdaıda bolǵan eski saman mekteptiń ornyna 300 oryndyq jańa mektep salynýy aýyl balalary úshin qaýipsiz ári qolaıly bilim keńistigin qalyptastyrdy. Sondaı-aq Shornaq aýylynyń Asha eldi mekeninde ashylǵan №5 jalpy bilim beretin mektep kórshiles bilim berý uıymdaryndaǵy úsh aýysym máselesiniń aldyn alyp, oqýshylardy zamanaýı materıaldyq-tehnıkalyq bazamen qamtýǵa múmkindik berdi.
Ulttyq joba aıasynda boı kótergen bul mektepterde fızıka, hımııa, bıologııa zerthanalary, IT, robototehnıka, STEM kabınetteri, sport jáne shyǵarmashylyq zaldary tolyq jabdyqtalǵan. Mundaı múmkindikter oqýshylardyń jan-jaqty damýyna, al pedagogterdiń jańa ádistermen nátıjeli jumys isteýine jol ashyp otyr. Saýran aýdanynda júzege asyrylǵan «Keleshek mektepteri» ulttyq jobasy – balalar bolashaǵyna salynǵan berik negiz ári ustaz eńbegine kórsetilgen naqty qoldaýdyń jarqyn kórinisi.